Məhərrəm İmamverdiyev: Turnirlərdə yalnız qızıl medal üçün mübarizə aparacağam
Bakı, 28 mart, AZƏRTAC
Bu, rəsmi beynəlxalq yarışlarda ilk qızıl medalımdır. Dizimdən əməliyyat olmağıma baxmayaraq, qalib olmağı bacardım. Bundan sonra turnirlərdə yalnız qızıl medal üçün mübarizə aparacağam.
AZƏRTAC xəbər verir ki, bu sözləri Avropa Cüdo Birliyinin (EJU) rəsmi saytına müsahibəsində Afinada gənclər arasında keçirilən Avropa kuboku turnirində qızıl medal qazanan Azərbaycan cüdoçusu Məhərrəm İmamverdiyev bildirib.
EJU-nun rəsmi saytında dərc edilmiş məqalədə qeyd edilib ki, 27 ölkədən 300 idmançının qatıldığı turnirin ikinci günü Azərbaycan üçün çox uğurlu keçib. Finalda 81 kiloqram çəki dərəcəsində yarışan Məhərrəm İmamverdiyevin performansı və rəqibinə qarşı tətbiq etdiyi fənd böyük həyəcanla izlənilib. Yazıda M.İmamverdiyevin qələbəsi belə şərh edilib: “Finalın sonuna cəmi 25 saniyə qalmış İmamverdiyev vazari fəndi tətbiq edərək təmiz qələbə qazanıb və qızıl medal əldə edib”.
Məqalədə 100 kiloqramdan yuxarı çəki dərəcəsində mübarizə aparan təmsilçilərimiz Hüseyn Məmmədov və Kənan Nəsibovun bütün rəqiblərini geridə qoyaraq finalda qarşılaşdıqları və bununla da, ümumi komanda hesabında Azərbaycan yığmasının üçüncü yeri tutması vurğulanıb.
Turnirin qalibi olan Kənan Nəsibov müsahibəsində növbəti turnirlərdə hədəfinin yalnız çempionluq olacağını bildirib: “Çox çətin yol fəth etdikdən sonra, əziyyətim öz bəhrəsini verdi. Bundan sonra diqqətimi bu il Avropa və dünya çempionatlarında qızıl medal qazanmağa yönəldəcəyəm”.
Bölmənin digər xəbərləri
