Mehriban Vəliyeva: Bakı Enerji Həftəsi qlobal enerji strategiyasının vacib platformasına çevrilib
Bakı, 3 iyun, AZƏRTAC
Dünyanın qabaqcıl enerji şirkətlərinin rəhbərlərinin, dövlət rəsmilərinin qatıldığı Bakı Enerji Həftəsi yeni çağırışların müzakirəsi, məlumatlar mübadiləsi və imkanların təqdimatı baxımından mühüm platformaya çevrilib. Enerji sahəsində dövlət-özəl əməkdaşlığının gücləndirilməsi, yeni ideyaların müzakirəsi gələcəkdə daha səmərəli və real addımların atılmasını şərtləndirir. 30 illik yubileyini qeyd edən “Baku Energy Forum”u təsis edildiyi gündən beynəlxalq əlaqələrin möhkəmləndirilməsi, qabaqcıl təcrübələrin mübadiləsi və regionun enerji sektorunun inkişafına təsir edən sazişlərin imzalanması baxımından ciddi uğurlara imza atıb. Avropadan Asiyaya qədər ölkələrin və şirkətlərin maraqlarını birləşdirən Bakı Enerji Həftəsi həm regional, həm də qlobal iqtisadi əhəmiyyətə malikdir. Şirkətlər Bakıda yeni texnologiyalarını təqdim etməklə gələcək əməkdaşlığın təməlini qoyurlar. Həmçinin Azərbaycanın bu sahədəki potensialını iştirakçılara təqdim edir. Bütün hallarda Bakı Enerji Həftəsi çərçivəsində keçirilən 30-cu Yubiley Beynəlxalq Xəzər Neft və Qaz Sərgisi, 13-cü Xəzər Beynəlxalq Energetika və Yaşıl Enerji Sərgisi ölkə iqtisadiyyatına töhfələr verəcək.
Bu fikirləri AZƏRTAC-a müsahibəsində Milli Məclisin deputatı Mehriban Vəliyeva deyib.
Deputat bildirib ki, Azərbaycanın dünyanın diqqət mərkəzində olan şaxələndirilmiş enerji siyasətinə maraq zaman keçdikcə daha da artır: “Bakı Enerji Həftəsi çərçivəsində keçirilən 30-cu sərgidə 30 ölkədən 200-dən çox şirkətin təmsil olunması Azərbaycana və onun enerji resurslarına olan marağın göstəricisidir. Əsası Ümummilli Lider Heydər Əliyev tərəfindən qoyulan neft strategiyası bu gün Prezident İlham Əliyev tərəfindən uğurla davam etdirilir. Prezidentin Bakı Enerji Həftəsinin açılış mərasimindəki çıxışı bir daha sübut etdi ki, Azərbaycan yalnız enerji ixracatçısı deyil, həm də enerji siyasətində regional və qlobal miqyasda strateji liderdir. Enerji sahəsində geniş beynəlxalq əməkdaşlıq olmadan çətinliklərin öhdəsindən gəlmək, ortaya real nəticələr qoymaq çətindir. Xüsusilə də siyasi böhranın, iqtisadi çətinliklərin, müharibə və yoxsulluğun hökm sürdüyü ölkələrə investor cəlb etmək o qədər də asan deyil. Amma Ümummilli Lider Heydər Əliyev bunu bacardı. Məhz onun dərin zəkası, qətiyyəti sayəsində 1994-cü ildə “Əsrin müqaviləsi” bağlandı və bu müqavilə Azərbaycanın müasir enerji strategiyasının təməlində dayanır. Bu gün Azərbaycan sabit siyasi sistemə və inkişaf etməkdə olan iqtisadiyyata malik ölkədir. Prezidentin də qeyd etdiyi kimi, neft və qazın bizim ümumi daxili məhsulda (ÜDM) payı təqribən 30 faizdən artıqdır. Azərbaycan genişmiqyaslı islahatlar həyata keçirir. Bizim iqtisadiyyatımız özünü təmin edir. Bizim xarici borcumuzun səviyyəsi ÜDM-in 7 faizindən azdır və maliyyə ehtiyatlarımız borcumuzu 14 dəfə üstələyir. Biz milli sərvətlərin düzgün bölüşdürülməsi nəticəsində yoxsulluğun azaldılmasına müvəffəq olduq və bu gün yoxsulluq səviyyəsi 5 faizə bərabərdir”.
Mehriban Vəliyeva qeyd edib ki, bu gün Azərbaycanın Avrasiyanın əsas enerji arteriyalarından birinə çevrilməsi uzun müddət aparılan gərgin işin, məqsədyönlü fəaliyyətin nəticəsidir: “3500 kilometrlik strateji marşrut olan Cənub Qaz Dəhlizi ölkəmizi istehsalçı və tranzit ölkələr arasında strateji platformaya çevirib. Hazırda Azərbaycan 12 ölkəyə qaz ixrac edir və ixrac coğrafiyası genişlənməkdə davam edir. Azərbaycandan qaz alan ölkələrin 10-u Avropa ölkəsidir. Keçən il Azərbaycan xarici bazarları 25 milyard kubmetr qaz ilə təchiz edib.
Prezident təbii qaz ixracımızın ötən il 25 milyard kubmetrə çatdığını diqqətə çatdırdı. Ölkəmiz hasilatı artırmaq niyyətindədir, artıq yeni müqavilələr imzalanıb. Azərbaycan 2030-cu ilədək qaz ixracını 8 milyard kubmetrə qədər artırmağı hədəfləyir. İmzalanmış müqavilələrə və sərmayə öhdəliklərinə əsasən 2030-cu ilədək 6,5 giqavat həcmində istehsal edilə biləcək bərpaolunan enerji gücünə malik olacağıq. Bu da ölkəmizin ümumi enerji istehsalının 35 faizdən çoxunu təşkil edəcək. Azərbaycan təkcə enerji tədarük etmir, həm də geosiyasi sabitliyin formalaşmasında vacib rol oynayır. Enerji təhlükəsizliyinin möhkəmləndirilməsi, enerji təchizatının şaxələndirilməsi və yaşıl enerji üzrə davamlı inkişaf bu gün də ölkəmizin əsas prioritetləri sırasındadır”.
Bölmənin digər xəbərləri
