Meksikanın “The News” qəzetində Xocalı soyqırımı ilə bağlı məqalə dərc olunub
Bakı, 1 oktyabr, AZƏRTAC
Meksikanın ingilisdilli “The News” qəzetində baş redaktor Teresa Marqolisin Xocalı soyqırımı ilə bağlı məqaləsi dərc edilib.
Azərbaycanın Meksikadakı səfirliyindən AZƏRTAC-a verilən məlumata görə, müəllif yazıda insanlığa qarşı dözülməz cinayətlərə son qoymaq üçün iqtisadi sanksiyalar, tərk-silah, cinayətlərin ifşasına beynəlxalq medianın diqqətinin cəlb edilməsi, hər bir ölkənin, insanın mənəvi məsuliyyətinin ortaya qoyulması, etinasızlıq siyasətinin pislənilməsi kimi üsullardan istifadə etməklə mübarizə aparılması zərurətini qeyd edib. Eyni zamanda, o bildirib ki, soyqırımı hadisələri ümumən haqlı olaraq pislənsə də bəzi hallarda belə hadisələr diqqətdən kənarda qalır, dünya ictimaiyyəti tərəfindən qınanmır.
Teresa Marqolis buna misal olaraq, 1992-ci ildə Azərbaycanın Xocalı qəsəbəsində həyata keçirilmiş qırğından bəhs edir. Müəllif 24 il əvvəl Ermənistan-Azərbaycan, Dağlıq Qarabağ müharibəsi zamanı erməni qoşunlarının Azərbaycan ərazisinə hərbi müdaxiləsi zamanı bu şəhəri yerlə yeksan edərək, 83 nəfəri on dörd yaşına qədər azyaşlı olmaqla 613 günahsız mülki şəxsin xüsusi amansızlıqla qətlə yetirdiklərini, min nəfərdən artıq etnik azərbaycanlıya ağır xəsarətlər yetirildiyini, digər min nəfərin əsir götürüldüyünü, yüz əlli nəfərin isə itkin düşdüyünü xüsusi həssaslıqla qələmə alıb. İnsident zamanı insanlara qarşı ağlasığmaz xəsarətlər yetirilməsi, onların diri-diri doğranması, köməksiz anaların gözləri qarşısında övladlarının gözlərinin çıxarılmasını, çığıran uşaqların ucu şiş alətlərə keçirilməsi barədə müəllifin qələmə aldıqlarını oxuyarkən bu hadisələrdən xəbəri olmayan insanlar belə sarsıntı keçirirlər. Məqalədə bu qanlı cinayəti şüurlu şəkildə vəhşicəsinə həyata keçirənlərin əsir götürülmüş kişilərin gözləri qarşısında onların qadın və qızlarını zorlaması qeyd olunur. Erməni silahlı qüvvələrinin və muzdlularının vəhşi zorakılığından çox az sayda insanın qaçıb qurtulduğu bildirilir. Eyni zamanda, məqalədə qətlə yetirilənlərin 56 nəfərinin xüsusi amansızlıqla diri-diri yandırılmasından, dərilərinin soyulmasından və başlarının kəsilməsindən bəhs olunur.
Teresa Marqolis beynəlxalq ictimaiyyət tərəfindən Xocalı qırğınının pislənildiyini, “Human Rights Watch” və “Memorial” kimi insan hüquqları üzrə təşkilatların bu kütləvi qırğına heç bir halda haqq qazandırıla bilməyəcək hadisə olduğunu elan etməsindən, lakin BMT tərəfindən bu qırğına yetərincə effektiv qiymət verən qətnamənin qəbul olunmamasından və beynəlxalq ictimaiyyətin əksər hissəsinin öz diqqətini digər problemlərə yönəldərək tədricən Xocalı faciəsini unutduqlarını təəssüf hissi ilə qeyd edir.
Müəllif bildirib ki, soyqırımı hər hansı formasından asılı olmayaraq mənəviyyat, həmçinin etika baxımından beynəlxalq ictimaiyyət tərəfindən dözülən və qəbul edilən olmamalıdır. Xocalı əhalisinə qarşı həyata keçirilən cinayət bütün insanlığa qarşı törədilmiş cinayətdir.
Məqalənin sonunda müəllif dünyanın bütün proqressiv qüvvələrini Ermənistanı Xocalı qətliamına görə məsuliyyəti öz üzərinə götürməyə məcbur etmək üçün inadlı mövqe tutmaqla, Ermənistan və Azərbaycan arasında barışıq əldə olunması yolunda duran maneələrdən birini aradan qaldırmağa, bu iki ölkə arasında münasibətlərin sağlamlaşdırılması və konfliktin ədalətli həllini təmin etməkdə yardımçı olmağa səsləyir.
Bunu etmək əvəzinə, Ermənistanın həmişəki kimi ona məxsus təkəbbürlə hərbi qüvvələrinin Azərbaycan ərazisindən çıxarılması üçün beynəlxalq səylərə məhəl qoymadan Azərbaycanın 20 faiz ərazisini işğal altında saxlamağa davam etdiyi bildirilir.
Bölmənin digər xəbərləri
