Sentyabrın 30-da parlamentin deputatları ikinci çağırış Milli Məclisin payız sessiyasına başladılar. 

Azərbaycan Respublikasının Dövlət himni səsləndi.

Milli Məclisin sədri Murtuz Ələsgərov parlamentin payız sessiyasını açaraq, deputatları sessiyanın başlanması münasibətilə təbrik etdi və qanunvericilik fəaliyyətində onlara uğurlar arzuladı.

Murtuz Ələsgərov Milli Məclisin yaz və növbədənkənar sessiyaları üzərində ətraflı dayandı. O, qanunvericilik orqanının həmin dövrdəki işini səmərəli adlandıraraq bildirdi ki, parlament 114 qanun və qərar qəbul etmişdir. “Azərbaycan Respublikasında insan hüquq və azadlıqlarının həyata keçirilməsinin tənzimlənməsi haqqında”, “Azərbaycan Respublikasının Nazirlər Kabinetinə Azərbaycan Respublikasının Milli Məclisi tərəfindən etimad məsələsinin həll edilməsi hüququnun əlavə təminatı haqqında” Konstitusiya qanunları birinci oxunuşda qəbul olunmuşdur. Bundan əlavə, sessiyalarda “Gənclər siyasəti haqqında”, “Büdcə sistemi haqqında”, “Televiziya və radio yayımı haqqında” qanunlar və digər qanunvericilik aktları qəbul edilmişdir. Ölkəmizin bir sıra mühüm beynəlxalq konvensiyalara və sazişlərə qoşulması qanunvericilik qaydasında təmin olunmuşdur.

Milli Məclisin sədri parlamentin bu il uyulun 29-da keçirilmiş və “Azərbaycan Respublikasının Konstitusiyasında dəyişikliklər edilməsi haqqında” referendum aktına həsr olunmuş növbədənkənar sessiyasının əhəmiyyətini xüsusi vurğulayaraq dedi ki, deputatlar Azərbaycan xalqına müraciət qəbul edərək, Prezident Heydər Əliyevin siyasətini tamamilə bəyəndiklərini bildirmişdilər. Avqustun 24-də referendum əhalinin siyasi fəallığı şəraitində keçmiş və dövlətimizin başçısının uzaqgörən, müdrik siyasətinin xalq tərəfindən tamamilə dəstəklədiyini nümayiş etdirmişdir.

Sədr parlamentin beynəlxalq əlaqələrindən danışaraq xatırlatdı ki, yaz sessiyasından sonra Milli Məclisin nümayəndə heyətləri bəzi xarici ölkələrdə olmuş, ölkəmizin üzv olduğu beynəlxalq təşkilatların fəaliyyətində yaxından iştirak etmişlər. Murtuz Ələsgərov Milli Məclisin nümayəndə heyətinin Avropa Şurası Parlament Assambleyasının payız sessiyasında iştirakını və nümayəndə heyətinin başçısı İlham Əliyevin bu sessiyadakı çıxışlarını yüksək qiymətləndirdi.

Məlum olduğu kimi həmin sessiyada Ermənistan və Azərbaycanın Avropa Şurası qarşısında götürdükləri öhdəlikləri yerinə yetirməsi məsələləri də müzakirə edilmişdir. Nümayəndə heyətimizin başçısı İlham Əliyev sessiya iştirakçılarına ölkəmizdə gedən iqtisadi inkişaf prosesləri, Azərbaycanda aparılan demokratik islahatlar barədə ətraflı məlumat vermişdir. Müzakirələr zamanı AŞPA deputatlarının böyük əksəriyyəti bir milyondan çox azərbaycanlının qaçqın-köçkün vəziyyətinə düşməsinə gətirib çıxarmış Ermənistanın işğalçı olduğunu təsdiqləmişdir. Azərbaycana dair qətnamədə siyasi islahatların aparılması sahəsində əldə edilmiş nailiyyətlər yüksək qiymətləndirilmişdir. Bütün bunlar Azərbaycan parlamenti nümayəndə heyətinin İlham Əliyevin rəhbərliyi ilə gördüyü gərgin işin nəticəsidir. İndi Avropa Şurasında ölkəmizin rəyi ilə hesablaşırlar və Azərbaycan bu beynəlxalq təşkilatın layiqli üzvünə çevrilir.

Murtuz Ələsgərov qarşıdakı işlərdən danışaraq dedi ki, payız sessiyyasında bir sıra mühüm qanunvericilik aktlarının qəbul olunması gözlənilir. İlk növbədə, referendum aktının qüvvəyə minməsi ilə əlaqədar ölkə qanunvericiliyi Konstitusiyanın yeni mətninə uyğunlaşdırılmalıdır. Konstitusiyada edilmiş dəyişikliklərin bir hissəsi parlamentin fəaliyyətinin təşkili ilə bağlıdır. Buna görə də Milli Məclisin daxili Nizamnaməsinə dəyişikliklər və əlavələr ediləcəyi, yaz və payız sessiyalarının keçirilməsi müddətinin dəyişdiriləcəyi gözlənilir.

Parlamentdə müzakirə olunacaq digər mühüm sənəd Seçki Məcəlləsidir. İndi bu sənədin layihəsi üzərində iş gedir və üç beynəlxalq təşkilatın - Avropa Şurasının, ATƏT-in və İFES-in bu sənəd haqqında rəyi öyrənilir. Onların təklif və qeydləri alındıqdan sonra layihə Milli Məclisin müzakirəsinə çıxarılacaqdır. Payız sessiyasında terrorizmlə mübarizə, dövlət elmi-texniki siyasəti, daşınmaz əmlakın dövlət reyestri, ictimai televiziya və radio yayımı, dövlət dili, Bakı şəhərinin statusu haqqında qanun layihələri də müzakirə olunacaqdır.

Murtuz Ələsgərov əmin olduğunu bildirdi ki, bütün bu qanunların qəbul edilməsi ölkəmizin bütün sahələrdə ardıcıl inkişafına təkan verəcəkdir.

Sonra deputatlar 2002-ci ilin payız sessiyasında Milli Məclisin qanunvericilik işinə dair planının müzakirəsinə başladılar. Sənəd səs çoxluğu ilə təsdiq olundu.

Oktyabrın 1-də sessiya işini davam etdirəcəkdir.