Millimizin baş məşqçisi Canni De Byazi: Futbolçulardan bu cür oyun gözləmirdim
Bakı, 26 mart, AZƏRTAC
İstədiyimiz oyunu nümayiş etdirə bilmədik. Futbolçulardan bu cür oyun gözləmirdim. Oyunumuzdan narazı qaldım.
AZƏRTAC xəbər verir ki, bu sözləri Malta yığması ilə səfərdə yoldaşlıq oyunu keçirən Azərbaycan millisinin baş məşqçisi Canni De Byazi matçdan sonra təşkil olunan mətbuat konfransında deyib.
İtaliyalı mütəxəssis rəqibin millimizdən daha yaxşı oynadığını və topa nəzarət edən tərəf olduğunu bildirib. Komandamızın ikinci hissənin əvvəlində fərqlənmə imkanlarının olduğunu, amma əksinə, rəqibin bunu bacardığını qeyd edən məşqçi, millimizin çox qollar buraxmasının onu narahat etdiyini diqqətə çatdırıb. O, milli komandamızın yaxşı nəticələr qazana bilməsi üçün futbolçularımızın əllərindən gələni etməli olduqlarını söyləyib.
"Daha əvvəl demişdim ki, taktiki baxımdan dəyişikliklər ola bilər. İndi edə bilməsək, nə vaxt edəcəyik? Çox narazıyam. Hər şey istədiyimiz kimi alınmadı. Bəzi oyunçulardan daha çox şey gözləyirəm. Çoxlu fərdi səhvlərə yol veririk. Bu da məni narahat edir. Malta təxminən bizimlə eyni səviyyədədir. Belə oyunlar bizim üçün yaxşı dərs olmalıdır. Yaxşı nəticələr qazanmaq üçün daha istəkli olmalıyıq", - deyə baş məşqçi əlavə edib.
Malta-Azərbaycan matçı millimizin minimal hesablı məğlubiyyəti ilə başa çatıb - 0:1.
Qeyd edək ki, millimiz martın 29-da növbəti yoldaşlıq oyununu keçirəcək. Seçməmiz Maltada Latviya yığması ilə üz-üzə gələcək.
Bölmənin digər xəbərləri
