Millimizin baş məşqçisi Milan Obradoviç: Oyunda layiqli qələbə qazandıq
Bakı, 25 mart, AZƏRTAC
Gec də olsa hamını Novruz bayramı münasibətilə təbrik edirəm. Bugünkü dəstəklərinə görə sumqayıtlı azarkeşlərə təşəkkürümü bildirirəm. Onlar bizi çox gözəl dəstəklədilər və lazımi enerjini verdilər. Futbolçularıma da təşəkkür edirəm. Onların sayəsində layiqli və haqq etdiyimiz qələbəni qazandıq.
AZƏRTAC xəbər verir ki, bunu 21 yaşadək futbolçulardan ibarət komandalar arasında Avropa çempionatının seçmə mərhələsi çərçivəsində martın 25-də keçirilmiş Azərbaycan - Estoniya oyunundan sonra təşkil olunmuş mətbuat konfransında millimizin baş məşqçisi Milan Obradoviç deyib.
Millimizin baş məşqçisi qeyd edib ki, rəqibin oyunları izləyib, analiz etmişdik. Estoniyadan bu oyunu gözləyirdik. Bilirdik ki, uzun ötürmələr, standart vəziyyətlər və başla oyuna üstünlük verir. Səbir etməli, fürsətlərimizi gözləməli və qol vurmalı idik. Fasilədə futbolçulara bu istiqamətdə tapşırıqlar vermişdik. Belə futbol oynayan komandalarla görüşlərdə rəqibin açılması üçün daha tez qol vurmaq vacib idi. Əsası odur ki, çıxışımızda həyəcan yox idi və rəqibin belə oyununa hazır idik.
Xatıladaq ki, Sumqayıtdakı “Kapital Bank Arena”da keçirilmiş qarşılaşma yığmamız 3:0 hesablı qələbə qazanıb. U-21-in qollarını 44 və 66-cı dəqiqələrdə Musa Qurbanlı və 88-ci dəqiqədə Abdulla Xaybulayev vurublar. Azərbaycan yığması 7 oyundan sonra 4 xalla beşinci pillədə qərarlaşıb.
Bölmənin digər xəbərləri
