Mina qurbanlarının hüquqlarının müdafiəsi üzrə beynəlxalq platforma təsis edilib
Bakı, 12 may, AZƏRTAC
İndoneziyanın Borneo adasında keçirilən Ətraf mühitin müdafiəsi sahəsində beynəlxalq simpoziumda Mina qurbanlarının hüquqlarının müdafiəsi üzrə beynəlxalq gənclik platforması təsis edilib.
AZƏRTAC xəbər verir ki, İslam Əməkdaşlığı Gənclər Forumu (İƏGF) Avrasiya Regional Mərkəzinin tərəfdaşlığı ilə keçirilən simpozium çərçivəsində “Gənclərin minalarla mübarizəsi” mövzusunda beynəlxalq ekspertlər və ASEAN regionundan olan çoxsaylı gənc fəalların iştirakı ilə keçirilən iclasda bununla bağlı bəyanat qəbul olunub.
İclasda çıxış edən Azərbaycanın İndoneziyadakı səfiri Cəlal Mirzəyev, Cənubda Dayanıqlı İnkişaf Komissiyasının direktoru Qayser Nəvvab, İƏGF Avrasiya Regional Mərkəzinin icraçı direktoru Vüsal Qurbanov, Bosniya və Herseqovina Mülki Müdafiə Federal Agentliyin nümayəndəsi Majda Kovaç münaqişələrin ağır nəticəsi olan minaların bəşəriyyət üçün törətdiyi fəsadlar fonunda yaradılmış platformanın əhəmiyyətindən, onun perspektivlərindən bəhs ediblər.
Azərbaycan Respublikasının Minatəmizləmə Agentliyinin (ANAMA) departament müdiri Ramil Əzizov çıxışında Ermənistanın işğalı dövründə Qarabağda yüz minlərlə minanın basdırılması, təkcə son iki ildə 300-dən çox Azərbaycan vətəndaşının mina hadisələrinin qurbanı olması, Ermənistan hökumətinin minaların yalnız 25 faizinin yeri ilə bağlı xəritələrin ölkəmizə verməsi barədə ətraflı məlumat verib.
Borneo simpoziumunun nəticəsində yekdilliklə qəbul edilən “Gənclərin minalarla mübarizəsi” adlı bəyanatda BMT, İƏT və ASEAN kimi qurumların sülh və təhlükəsizlik prinsipləri əsas götürülərək, yeni təsis edilmiş platformanın beynəlxalq və regional təşkilatlarda mina qurbanlarının haqlarının qorunması məsələsinin qaldırılması əsas vəzifə kimi qeyd olunub. Eyni zamanda, zərərçəkmiş mülki əhaliyə hüquqi yardımın göstərilməsi, həmçinin minalarla mübarizə sahəsində məlumatlılığın artırılması məqsədilə müvafiq təhsil proqramlarının həyata keçirilməsi də beynəlxalq platformanın vacib fəaliyyət istiqamətini təşkil edəcək.
Bəyanatda platformanın bu ilin payızınadək tam təşkilatlanması hədəf olaraq göstərilir.
Bölmənin digər xəbərləri
