Mingəçevir Dövlət Universitetində “Qanlı Yanvar – Qürur və qəhrəmanlıq günü” mövzusunda konfrans keçirilib
Mingəçevir, 19 yanvar, Vüsalə Cənnətova, AZƏRTAC
Mingəçevir Dövlət Universitetində 20 Yanvar faciəsinin 36-cı ildönümünə həsr olunmuş “Qanlı Yanvar – Qürur və qəhrəmanlıq günü” mövzusunda konfrans keçirilib.
AZƏRTAC-ın bölgə müxbirinin verdiyi məlumata görə, tədbirdən öncə Ümummilli Lider Heydər Əliyevin Mingəçevir Dövlət Universitetindəki büstü önünə gül dəstələri düzülüb, dahi şəxsiyyətin xatirəsi dərin hörmət və ehtiramla anılıb.
Konfrans Ulu Öndər Heydər Əliyevin və şəhidlərimizin əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb.
Tədbiri açan Mingəçevir Dövlət Universitetinin rektoru Anar Eminov 20 Yanvar hadisələrinin xalqımızın azadlıq iradəsinin, milli birliyinin və mübarizə ruhunun parlaq təcəssümü olduğunu bildirib, bu faciənin Azərbaycanın müstəqillik yolunda dönüş nöqtəsi olduğunu vurğulayıb. Rektor çıxışında Ümummilli Lider Heydər Əliyevin 20 Yanvar faciəsinə verdiyi tarixi-siyasi qiymətə xüsusi yer ayıraraq qeyd edib ki, Ulu Öndər Moskvada verdiyi bəyanatla bu cinayəti açıq şəkildə pisləmiş, xalqın haqq səsini dünyaya çatdırmış və 1994-cü ildə hadisələrə dövlət səviyyəsində siyasi-hüquqi qiymət verilməsinə nail olmuşdur. Eyni zamanda vurğulanıb ki, Prezident İlham Əliyevin rəhbərliyi ilə 20 Yanvar şəhidlərinin xatirəsinin əbədiləşdirilməsi, şəhid ailələrinə göstərilən diqqət və qayğı bu siyasətin ardıcıl şəkildə davam etdirildiyini göstərir. Bildirilib ki, bu, Ümummilli Lider Heydər Əliyevin müəyyənləşdirdiyi strateji xəttin uğurlu davamıdır.
Sonra 20 Yanvar faciəsinə həsr olunmuş videoçarx nümayiş etdirilib. Konfrans universitetin müəllimlərinin məruzələri ilə davam edib. Səma Süleymanova “20 Yanvar – milli iradə və imperiya zorakılığına siyasi baxış”, Günel Yunusova “Qan və qələm: 20 Yanvarın bədii yaddaşı”, Tural Həsənqarayev “20 Yanvar hadisələrinin sənədləşməsində mətbuatın tarixi rolu” və Gulnar Məmmədova “Kollektiv travma və milli kimlik: 20 Yanvar hadisələrinin psixoloji analizi” mövzularında məruzələrlə çıxış ediblər.
Sonda mövzu ətrafında geniş müzakirələr aparılıb. Müzakirələr zamanı Humanitar fənlər kafedrasının müdiri Esmira Cəfərova, kafedranın müəllimləri Mirzə Cavadov və İlham Məmmədov mövzu ilə bağlı faktlardan söhbət açıb, 20 Yanvar faciəsinin tarixi-siyasi mahiyyətini, onun müstəqillik yolunda dönüş nöqtəsi olduğunu vurğulayıblar.
Bölmənin digər xəbərləri
