MOSKVADA AZƏRBAYCANLILARIN İCTİMAİ TƏŞKİLATLARI ARASINDA NƏRD ÜZRƏ TURNİR KEÇİRİLMİŞDİR
Moskva, 1 iyun (AZƏRTAC). Moskvadaki “Bakı” kinoteatrında Moskvanın və Moskva vilayətinin azərbaycanlıların ictimai təşkilatları arasında Azərbaycan Xalq Cümhuriyyətinin 91-ci ildönümünə həsr olunmuş klassik nərd üzrə turnir keçirilmişdir. Turnirin təşkilatçıları Moskva yaxınlığındakı İstrinsk rayonu azərbaycanlıları Milli-mədəni muxtariyyəti, “İnkişaf” mədəniyyət və idman inkişaf Fondu, Rusiya Azərbaycanlıları Konqresinin Moskva Regional şöbəsi, sponsorları isə Rusiya azərbaycanlıları gənclər təşkilatı (RAGT) və Rusiya Azərbaycanlıları Federal Milli-mədəni muxtariyyatıdır (RAFMM).
Dedovsk şəhərindən (Moskva vilayəti) Elşən Məcirov 7 xal toplayaraq turnirin mütləq çempionu adını qazanmışdır. Qalibə RAFMM-in “Ən yaxşı oyunçusu” xüsusi mükafatı təqdim edilmişdir. RAFMM-in vitse-prezidenti Nizami Bəşirov mükafatı təqdim edərkən bildirmişdir ki, nərd üzrə keçirilən turnirlər milliyyətindən, peşəsindən, sosial mənşəyindən asılı olmayaraq bir çox insanların rəğbətini qazanmışdır. O, ümid etdiyini bildirmişdir ki, belə turnirlər daimi olacaq və bu oyunun daha çox həvəskarını yarışlara cəlb edəcəkdir.
Komanda hesabında da qaliblər müəyyənləşdirilmişdir. Belə ki, Müşviq Hacıyev, Cəlal Cəlalov və Vahid Ağayevin daxil olduğu komanda 1-ci yeri, Elşən İbrahimov, Elşən Məcirov və Elnur Əliyevin komandası 2-ci yeri, Saləddin Məmmədov, Teymuraz Ramazanov və Fəxrəddin Yusubovun daxil olduqları komanda 3-cü yeri tutmuşdur.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
