Moskvada Rusiya və Azərbaycan ictimai təşkilatları arasında əməkdaşlığın inkişafı yolları barədə müzakirələr aparılıb
Moskva, 30 noyabr, AZƏRTAC
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyevin rəhbərlik etdiyi nümayəndə heyəti Moskvada Rusiya İctimai Palatasında görüş keçirib. Görüşdə ikitərəfli əməkdaşlıq məsələləri və gələcək fəaliyyət planı müzakirə olunub.
AZƏRTAC xəbər verir ki, görüşdə, həmçinin Azərbaycanın Rusiyadakı səfiri Polad Bülbüloğlu, Azərbaycan-Rusiya parlamentlərarası əlaqələr üzrə işçi qrupunun sədri Əli Hüseynli, Rusiya İctimai Palatası yanında Beynəlxalq Əməkdaşlıq və Kütləvi Diplomatiya İctimai Şurasının sədri Sergey Orconikidze və digərləri iştirak ediblər.
Görüşdə iki qurum arasında əməkdaşlığa dair memorandum layihəsi müzakirə olunub.
Səfir Polad Bülbüloğlu Azərbaycan və Rusiya xalqlarını çoxəsrlik dostluq əlaqələrinin birləşdirdiyini deyib, bu əlaqələrin daha da inkişaf etdirilməsinin vacibliyini diqqətə çatdırıb. “Mən çox şadam ki, Rusiya İctimai Palatası iki ölkənin ictimai əlaqələrinin genişləndirilməsinə mühüm əhəmiyyət verir”, - deyən səfir ictimai səviyyədə, parlamentlər səviyyəsində qarşılıqlı fəaliyyətin əhəmiyyətini qeyd edib. Səfir vurğulayıb ki, 25 illik müstəqilliyimiz dövründə biz bir-birimizi anlamağı, güzəştə getməyi, çətin vəziyyətlərdən çıxış yolları tapmağı öyrənmişik.
Dağlıq Qarabağ münaqişəsindən danışan P.Bülbüloğlu Azərbaycanın ərazi bütövlüyü məsələsinin heç zaman müzakirə mövzusu olmadığını qeyd edib. Azərbaycan ərazilərinin işğal altında olduğunu, Azərbaycan vətəndaşlarının öz torpaqlarında köçkünə çevrildiyini diqqətə çatdıran diplomat bu problemin həllinin dövlətimiz və xalqımız üçün çox vacib olduğunu qeyd edib. P.Bülbüloğlu Böyük Vətən müharibəsi illərində döyüşlərdə həlak olmuş azərbaycanlıların adlarının müəyyən edilməsi, gənclər arasında dostluq əlaqələrinin genişləndirilməsi sahələrində ictimai təşkilatların qarşılıqlı fəaliyyətinin vacibliyini vurğulayıb. Görüşdə Azərbaycan və Rusiya regionları arasında siyasi, iqtisadi və ticarət sahələrində münasibətlərin intensiv inkişafı ilə yanaşı, ictimai təşkilatlar arasında da əməkdaşlığın genişləndirilməsinin əhəmiyyətindən danışılıb.
QHT-lərə Dövlət Dəstəyi Şurasının sədri Azay Quliyev jurnalistlərə açıqlamasında Moskvaya dəvətə görə Rusiya İctimai Palatasının katibi Valeri Fadeyevə təşəkkürünü bildirib. Görüşün məqsədindən danışan deputat deyib ki, iki qurum arasında gələcək əməkdaşlıq məsələləri müzakirə edilib: “Azərbaycanla Rusiya arasında isti münasibətlər mövcuddur. Hər iki ölkə bir-birini strateji tərəfdaş adlandırır. Dövlət başçıları arasında münasibətlər yüksək səviyyədədir. Lakin ictimaiyyətlər arasında münasibətlərin vəziyyəti qənaətbəxş deyil. QHT-lərimizin birgə əməkdaşlığı üçün çox böyük potensialı var”.
Tərəflərin gələcək fəaliyyəti özündə əks etdirən çərçivə sənəd üzərində işlədiyini qeyd edən A.Quliyev sonuncu belə sənədin 2013-cü ildə imzalandığını xatırladaraq deyib: “Həmin sənədin vaxtı bitib. Onu yeniləmək lazımdır. Burada çox maraqlı və məhsuldar müzakirələrimiz oldu. Demək olar ki, bütün məsələlərdə vahid mövqe nümayiş etdirdik. Bəzi həssas məsələlərdə ümumi yanaşma yoxdur. Lakin ümid edirəm ki, bizim sonrakı dialoqumuz razılığa gəlməyə imkan verəcək. Dörd istiqamətdə işçi qrupların yaradılması haqqında razılığa gəldik. Bu işçi qrupları təhsil, elm və mədəniyyət sahələrində əməkdaşlıq, insan hüquqlarının qorunması, miqrasiya məsələləri və ictimai nəzarət, birgə tədbirlərin və mübadilə proqramlarının təşkili sahələrini əhatə edir”.
A.Quliyev miqrasiya məsələləri və insan hüquqlarının qorunması ilə bağlı işçi qrupun yaradılmasının önəmini qeyd edərək deyib: “Bildiyiniz kimi, Rusiyada xeyli sayda azərbaycanlı yaşayır. Onların hüquqlarının qoruması vacib məsələdir. İctimai Palata və Rusiyanın digər QHT-ləri bu məsələlərlə bağlı çox böyük işlər görə bilər. Bu işçi qrupun əsas vəzifəsi bu sahədə olan problemləri müəyyən etmək və onların aradan qaldırılması ilə bağlı addımlar atmaqdır”.
Şura sədri deyib ki, növbəti görüş Bakıda keçiriləcək. “Sənəd üzərində işləri davam etdirəcəyik. İctimai Palata rəhbərliyini Azərbaycana səfərə dəvət etdik. Ümid edirik ki, memorandumu tamamlayıb artıq Bakıda imzalaya biləcəyik”, - deyə o əlavə edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
