MOSKVADA UÇMUŞ BAZARIN DİREKTORUNUN HƏBSİ BARƏDƏ SANKSİYA VERİLMİŞDİR
Moskvanın Bauman küçəsindəki bazarın direktoru Mark Mişiyev binanın planını özbaşına olaraq dəfələrlə dəyişdirmişdir. Bu isə binanın nəzarətsiz vəziyyətə düşməsinə və konstruksiyaların aşınaraq dağılmasına gətirib çıxarmışdır. AZƏRTAC Rusiyanın NTV kanalına istinadla xəbər verir ki, bunu Moskva prokuroru Anatoli Zuyev bildirmişdir.
O vurğulamışdır ki, bazarın direktoru binanın texniki vəziyyətinin monitorinqini təşkil etməmiş, onun düzgün istismarı, cari və əsaslı təmiri üçün lazımi tədbirlər görməmişdir.
Prokuror demişdir: “İstintaqın müəyyən etdiyi kimi, Mişiyevin təqsiri ondadır ki, o, vətəndaşların təhlükəsizliyinin təmin olunması üçün üzərinə düşən peşə öhdəliklərini kobudcasına pozmuş və bu da nəticədə insan tələfatına gətirib çıxarmışdır”.
Zuyev həmçinin bildirmişdir ki, istintaq bazarın uçmasının hələlik üç ehtimalını araşdırır. Bunlar istismar qaydalarının pozulmasından, məsul şəxslərin qurğunun texniki vəziyyətinə nəzarət üzrə vəzifə borclarını lazımınca yerinə yetirməməsindən, habelə layihələşdirmə zamanı buraxılmış konstruksiya səhvlərindən ibarətdir.
Bölmənin digər xəbərləri
