MÜKAFATLANDIRMA MƏRASİMİ KEÇİRİLMİŞDİR
Bakı, 25 may (AZƏRTAC). Bu gün futzal üzrə ölkə çempionatının güclülər dəstəsinin mükafatçılarının təltifolunma mərasimi keçirilmişdir.
Bakı İdman Sarayında təşkil olunan tədbirdə AFFA-nın birinci vitse-prezidenti Rauf Əliyev, assosiasiyanın baş katibi Elxan Məmmədov, Azərbaycan Futzal Federasiyasının prezidenti Zaur Axundov, “Neftçi” İSM-in icraçı direktoru Sadıq Sadıqov iştirak ediblər.
Qalibləri təbrik edən AFFA-nın birinci vitse-prezidenti, millət vəkili Rauf Əliyev son vaxtlar ölkə futbolunun inkişafı istiqamətində görülən işlərdən danışmış, futzalçılarımızın nailiyyətlərinin davam edəcəyinə inandığını demişdir.
Daha sonra ölkə çempionatında ilk 3 yeri tutmuş komandalara medallar təqdim olunmuşdur. Beləliklə, “Araz”a qızıl, “Neftçi”yə gümüş, “Azmetko”ya isə bürünc medal verilmişdir.
Oyunları idarə edən hakimləri, eləcə də matçlar zamanı zədələnən futzalçılara ilk tibbi yardım göstərən Esmiralda Ələkbərovanı, oyunların katibi Abbaz Əzimovu da mükafatlandıran Futzal federasiyası bir neçə nominasiya üzrə mövsümün ən yaxşılarını da seçməyi yaddan çıxarmamışdır. Mövsümün ən yaxşı məşqçisi İlqar Aslanov, (“Azmetko”) ən yaxşı oyunçusu Maşado Nilson dos Santos, ən yaxş qapıçısı Ramin Həsənzadə (“Neftçi”), sərrast futzalçısı isə çempionatın hücumçusu 35 qol vurmuş Radiq Əhmədov (“Ekol”) seçilmişdir.
Bölmənin digər xəbərləri
