MÜLKİ MƏCƏLLƏNİN TƏKMİLLƏŞDİRİLMƏSİ İLƏ BAĞLI SEMİNAR İŞƏ BAŞLAMIŞDIR
Azərbaycan Respublikası Milli Məclisi Aparatı və Almaniya Texniki Əməkdaşlıq Cəmiyyətinin (GTZ) birgə təşkil etdiyi tədbirdə Prezidentin İcra Aparatının, Nazirlər Kabinetinin, Ədliyyə, Maliyyə, Vergilər və Nəqliyyat nazirliklərinin, Konstitusiya Məhkəməsinin, Dini Qurumlarla İş üzrə Dövlət Komitəsinin, prokurorluq və digər əlaqədar təşkilatların nümayəndələri iştirak etmişlər.
Milli Məclis Aparatının rəhbəri Səfa Mirzəyev seminarın məqsəd və məramından, Azərbaycanla GTZ arasında əlaqələrdən danışmışdır. Bildirmişdir ki, Azərbaycanda hüquq və qanunvericilik sahəsində həyata keçirilən islahatlar nəticəsində bu sistem daha da təkmilləşdirilir və bu işdə GTZ Azərbaycana yaxından kömək edir. Milli Məclis Aparatının, digər əlaqədar qurumların müraciətinə əsasən, GTZ/Bremen Universitetinin professorları Azərbaycan Respublikası Mülki Məcəlləsinin fiziki və hüquqi şəxslərə aid hissəsinin təkmilləşdirilməsi ilə bağlı yeni layihə hazırlamışlar. Layihədə Mülki Məcəllənin ümumi müddəaları, hüquqi və fiziki şəxslər haqqında ayrıca fəsillər, hüquqi və fiziki şəxslərin fəaliyyətinə nəzarət, onların qeydiyyatı və digər məsələlər əksini tapmışdır. Yeni layihə aidiyyəti təşkilatların nümayəndələrinin, mütəxəssislərin iştirakı ilə geniş müzakirə olunduqdan sonra, rəy və təkliflər nəzərə alınmaqla, qanuniləşdiriləcəkdir.
Layihənin müəlliflərindən biri - GTZBremen Universitetinin professoru Rolf Knieper demişdir ki, Azərbaycanda hüquq və qanunvericilik sahəsində həyata keçirilən islahatlar beynəlxalq təşkilatların diqqət mərkəzindədir. GTZ bu islahatları diqqətlə izləyir və dəstəkləyir. Bunun əyani sübutu kimi Mülki Məcəlləyə GTZ-nin təklifi ilə edilmiş 300-dək dəyişikliyi göstərmək olar. Yeni layihə, əsasən, məcəllənin fiziki və hüquqi şəxslərlə bağlı hissəsinə aiddir. Müəlliflər bu sahədə mövcud problemləri aradan qaldırmaq, qanunvericiliyi daha da təkmilləşdirmək məqsədi ilə xüsusi layihə hazırlamışlar. Hesab edirik ki, layihə ideal olmasa da, Avropa standartlarına uyğundur. Cəmiyyət daim inkişaf etdiyi üçün yeni qaydalar və tələblər ortaya çıxır. Ona görə də gələcəkdə bu sənədə də hansısa bir dəyişikliyin ediləcəyi istisna olunmur.
Sonra layihə ətrafında müzakirələr aparılmış, rəy və təkliflər bildirilmişdir.
Müzakirələr martın 7-də davam etdiriləcəkdir.
Bölmənin digər xəbərləri
