Müqəddəs Qurban bayramı müsəlmanların həmrəylik və qardaşlıq rəmzidir
Füzuli, 15 iyul, Aydın Yavərzadə, AZƏRTAC
Xalqımızın əsrlərin sınağından keçərək bu günümüzə qədər gəlib çıxan, ən çətin zamanlarda belə qoruyub saxlamağı bacardığı milli adət-ənənələri və bayramları var. Bizi tariximizə, soykökümüzə bağlayan, milli mənliyimizi təsdiqləyən bu adətlər və bayramlar bir xalq olaraq bizim əsas dəyərlərimiz, mənəvi mənbəyimizdir.
AZƏRTAC-ın bölgə müxbiri xəbər verir ki, bu fikirləri Füzuli rayonundan olan din xadimi Nəriman Nəsirov söyləyib.
Bildirib ki, keşməkeşli, çətin sınaqlarla dolu bir tarix yaşamışıq. Hər zaman Azərbaycan xalqı İslamın humanizm, bərabərlik və qardaşlıq prinsiplərinə sədaqətini nümayiş etdirib, əsrlər boyu, hətta ən mürəkkəb dövrlərdə belə Qurban bayramını özünün əziz günlərindən biri kimi qeyd edib.
Ulu öndər Heydər Əliyevin xalqın səsinə səs verərək hakimiyyətə qayıtması bütün itirdiklərimiz kimi milli-mənəvi dəyərlərimizin də bizə qaytarılmasına imkan yaratdı. Azərbaycanı bir dövlət kimi məhv olmaq təhlükəsindən xilas edən ümummilli lider Heydər Əliyev, eyni zamanda, dilimizi və dinimizi, islami dəyərlərimizi, milli kimliyimizin təsdiqi olan bayramlarımızı bizə qaytardı. Xalqımızın mənəvi birliyinin ifadəsi olan Qurban bayramının layiqincə qeyd edilməsi üçün əlverişli şərait yarandı. Bu bayram Azərbaycanda tolerantlığın təntənəsinə çevrildi. Müxtəlif dini konfessiyaların nümayəndələri də bu bayram günündə vahid Azərbaycan xalqının birlik və qardaşlığını nümayiş etdirir, müsəlman dostlarını təbrik edirlər. Azərbaycan müstəqilliyini bərpa etdikdən sonra bütün dünya müsəlmanlarının həmrəylik və qardaşlıq rəmzi olan Qurban bayramının ölkəmizdə dövlət səviyyəsində qeyd olunması xalqla dövlətin birliyini, Azərbaycan xalqının öz milli və dini ənənələrinə sadiq olduğunu dünyaya nümayiş etdirdi. Ümummilli lider Heydər Əliyev ölkəmizdə qeyd edilən dini bayramlar münasibətilə xalqı təbrik edib. Ulu Öndər müxtəlif illərdə Qurban bayramını məcburi köçkün soydaşlarımızla birgə keçirib. Bu görüşlərdə hər zaman xalqımızın haqq işinin qalib gələcəyinə, torpaqlarımızın işğaldan tezliklə azad ediləcəyinə qəti əminlik ifadə edən Ulu Öndərin qətiyyət dolu fikirləri, əminlik dolu çıxışları bu gün artıq reallığa çevrildi.
Sevindirici haldır ki, bu gün ümummilli lider Heydər Əliyevin yolunun və siyasi kursunun layiqli davamçısı, ölkə başçısı İlham Əliyev bütün sahələrdə olduğu kimi dini bayramlarla bağlı siyasi varislik ənənəsini uğurla davam və inkişaf etdirir. Dövlət başçımızın apardığı uğurlu siyasətin nəticəsi olaraq bu gün Azərbaycan dünyada tolerantlığın və multikulturalizmin nümunəvi məkanlarından birinə çevrilib. Yüz illərdir ki, ayrı-ayrı xalqların və dini mənsublarının mehriban ailə kimi yaşadıqları Azərbaycanda qarşılıqlı hörmət və etimada əsaslanan nümunəvi birgəyaşayış mühiti mövcuddur və etnik-mədəni müxtəliflik qorunub saxlanılır. Hər il ölkəmizdə rəsmi şəkildə qeyd edilən dini bayramlar mütərəqqi milli-mənəvi dəyərlərin, sosial yardımlaşmanın və xeyirxahlıq duyğularının təntənəsinə çevrilir, cəmiyyətimizdə birlik və bərabərlik ovqatını daha da gücləndirir. Hər il Prezident İlham Əliyev Azərbaycan xalqına bayram təbriki ünvanlayır və xoş arzularını çatdırır. Azərbaycan xalqının dini dəyərlərinə böyük qayğı və həssaslıqla yanaşan dövlət başçısının 2017-ci ili ölkəmizdə “İslam Həmrəyliyi İli” elan etməsi dini dəyərlərimizə və ümumilikdə İslam dünyasına olan diqqətin, hörmətin, ehtiramın nəticəsi idi.
Nəriman Nəsirov qeyd edib ki, hər il Qurban bayramlarında bütün müsəlmanlar kimi, biz füzulililər də dualar edib, Allahdan qurbanlarının qəbul, diləklərinin hasil olmasını istəyir. Hər bir azərbaycanlının ən böyük arzusu olan torpaqlarımızın işğaldan azad edilməsini və şəhidlərimizin ruhuna rahatlıq gəlməsini Uca Yaradandan diləmişik. Şükürlər olsun ki, hər zaman haqqın və ədalətin tərəfində olan xalqımızın arzuları, diləkləri haqqın dərgahında qəbul olundu. Müzəffər Ali Baş Komandan İlham Əliyevin ətrafında bir yumruq kimi birləşən xalqımız 44 günlük Vətən müharibəsində qələbə çaldı, Qarabağımız öz doğma sakinlərinə qovuşdu. İşğaldan azad edilmiş Füzuli şəhəri və 61 kəndimiz də eyni sevinci yaşadı. İllərdir yurd-yuvalarından ayrı düşən, doğmalarının məzarlarını ziyarət edə bilməyən füzulililərin də torpaq həsrətinə son qoyuldu.
Qurban bayramında müsəlmanlar Allah yolunda hər bir fədakarlığa hazır olduqlarını nümayiş etdirdikləri kimi Vətən müharibəsində də bütün Azərbaycan xalqı Müzəffər Ali Baş Komandan İlham Əliyevin rəhbərliyi altında Vətən naminə canlarından keçməyə belə hazır olduqlarını göstərdilər. Bu, Azərbaycan xalqının böyüklüyünün və öz ali dəyərlərinə sadiqliyinin ən parlaq ifadəsi idi. Bu gün Azərbaycanı ərazi bütövlüyünə qovuşduran, ay-ulduzlu bayrağı əzəli torpaqlarımızda dalğalandıran da xalqımızın öz yaddaşında, gündəlik həyatında qoruyub saxladığı bu dəyərlərdir. Qurban bayramı Allah yolunda fədakarlığın, İkinci Qarabağ müharibəsi isə Vətən yolunda fədakarlığın təntənəsidir. Vətən müharibəsində qazanılan Zəfər xalqımızın qurbanlarının və dualarının qəbul olunduğunun göstəricisidir.
“Əminik ki, dövlətimizin gücü və qüdrəti sayəsində işğaldan azad edilmiş bütün ərazilər, o cümlədən rayonumuzun azad edilmiş əraziləri tezliklə yenidən tikilib qurulacaq. Artıq rayonumuzda geniş tikinti quruculuq və bərpa işləri sürətlə davam etməkdədir. İşğal zamanı Füzuli rayonunun 16 məscidi, 30-a yaxın tarixi-dini abidələri erməni quldurları tərəfindən yandırılıb dağıdılıb. Əminik ki, erməni terrorunun qurbanına çevrilmiş ziyarətgahlarımız, məscidlərimiz tezliklə yenidən tikiləcək və bərpa olunacaq, məscidlərimizdən tezliklə azan səsi ucalacaq.
Bu il Qurban bayramında qurbanlarımızı işğaldan azad edilmiş Füzuli şəhərində və kəndlərimizdə kəsəcək, Allahdan şəhidlərimizə rəhmət, qazilərimizə şəfa diləyəcəyik. Bizə bu imkanı yaratdığına görə, dinimizə hər zaman dərin hörmətlə yanaşdığına, dini dəyərlərimizi daim uca tutduğuna görə ölkə başçısı İlham Əliyevə öz dərin minnətdarlığımızı bildiririk”, - deyə din xadimi Nəriman Nəsirov bildirib.
Bölmənin digər xəbərləri
