Murmansk bələdiyyə təşkilatının başçısı fəal ictimai fəaliyyətə görə həmyerlimizə təşəkkürünü bildirmişdir
Bakı, 9 iyun (AZƏRTAC). Ümumrusiya Azərbaycan Konqresinin (ÜAK) Murmansk bölməsinə Murmansk şəhər bələdiyyə təşkilatının başçısı Aleksey Vellerdən məktub gəlmişdir. O, həmyerlimiz Yasəmən Hüseynovaya təşəkkürünü bildirmiş və onu murmansklıların iki sevimli bayramına hazırlıqda iştirak etməyə dəvət etmişdir.
Oktyabr ayında Murmanskın yaranmasının 96-cı ildönümü və Murmanska “Qəhrəman şəhər” fəxri adının verilməsinin 25-ci ildönümü qeyd ediləcəkdir. Murmansk Rusiyanın bir neçə digər şəhəri ilə birlikdə düşmənin ən dəhşətli hücumlarına məruz qalmışdır.
Məktubun sonunda Murmansk bələdiyyə təşkilatının başçısı yazır: “Ümidvarıq ki, konstruktiv əməkdaşlığımız qarşıdan gələn bayram şənliklərinin parlaq, habelə əməksevər şəhərimiz kimi, mehriban qeyri-adi olmasına kömək edəcəkdir”.
Yasəmən Hüseynova 1969-cu ildə Naxçıvanın Şərur rayonunun Kərimbəyli kəndində anadan olmuşdur. Artıq 30 ilə yaxındır ki, Murmanskda yaşayır və işləyir.
Vilayətin Azərbaycan diasporunun nümayəndəsi Əlihüseyn Şükürov AZƏRTAC-a bildirmişdir ki, həmyerlimiz həm şəhərin tədbirlərində, həm də ÜAK Murmansk bölməsinin xətti ilə keçirilən tədbirlərdə fəal iştirak edir.
Bölmənin digər xəbərləri
