Naxçıvanda daşınmaz dövlət əmlakının icarəsindən büdcə daxilolmaları 12 dəfəyədək artıb
Naxçıvan, 8 aprel, AZƏRTAC
Naxçıvan Muxtar Respublikasında cari ilin I rübü ərzində daşınmaz dövlət əmlakının icarəsindən dövlət büdcəsinə 149,7 min manat məbləğində vəsaitin ödənilməsi təmin olunub. 2024-cü ilin eyni dövrü ilə müqayisədə 11,7 dəfə artım qeydə alınıb.
Naxçıvan Muxtar Respublikası İqtisadiyyat Nazirliyinin mətbuat xidmətindən AZƏRTAC-ın bölgə müxbirinə bildirilib ki, bu ilin I rübü ərzində daşınmaz dövlət əmlakının icarəyə verilməsi ilə bağlı 84 yeni müqavilə bağlanıb, 62 icarə müqaviləsinin müddəti uzadılıb.
Ötən ilin eyni dövrü ilə müqayisədə yeni icarə müqavilələrinin sayı 2,1, müddəti uzadılmış müqavilələrin sayı 1,9 dəfə çox olub.
2025-ci ilin I rübü ərzində Naxçıvanda 2219 daşınmaz əmlak üzərində mülkiyyət hüquqları dövlət qeydiyyatına alınıb. Ötən ilin müvafiq dövrü ilə müqayisədə qeydiyyata alınmış əmlakların sayında 8,1 faiz artım müşahidə olunub.
Bölmənin digər xəbərləri
