NAXÇIVANDA UŞAQLARI BEYNƏLXALQ MÜDAFİƏ GÜNÜ MÜNASİBƏTİLƏ BAYRAM TƏDBİRİ KEÇİRİLMİŞDİR
Naxçıvan, 2 iyun (AZƏRTAC). İyunun 1-də Naxçıvan şəhərindəki Heydər Əliyev Uşaq-Gənclər Yaradıcılıq Mərkəzində Uşaqları Beynəlxalq Müdafiə Gününə həsr olunmuş bayram tədbiri keçirilmişdir.
Naxçıvan Muxtar Respublikası Ali Məclisinin sədri Vasif Talıbov tədbirdə iştirak etmişdir.
Əvvəlcə mərkəzin foyesində Naxçıvan şəhərindəki 11 saylı uşaq bağçasının uşaqları ümummilli liderimizin, Azərbaycan Prezidentinin uşaqlar haqqında söylədiyi fikirləri tədbir iştirakçılarının diqqətinə çatdırmışlar. Onlar söz vermişlər ki, böyüyəndə Vətənə layiqli övladlar olacaqlar. Uşaqlar «İlhamlı günlər» mahnısının sədaları altında rəqs etmişlər.
«Şərur qönçələri» yallı ansamblının, Heydər Əliyev Uşaq-Gənclər Yaradıcılıq Mərkəzinin «Əlvan çiçəklər» mahnı və rəqs ansamblının çıxışları maraqla qarşılanmışdır.
Sonra Ali Məclisin sədri «Gəncliyimiz-gələcəyimiz» kitabını bir qrup istedadlı gəncə təqdim etmişdir.
Tədbir iştirakçıları mərkəzin foyesində təşkil edilən sərgiyə baxmışlar.
Mərkəzin zalında keçirilən tədbirdə çıxış edən Ali Məclisin sədri 1 iyun - Uşaqları Beynəlxalq Müdafiə günü münasibətilə Azərbaycanın, onun ayrılmaz tərkib hissəsi olan muxtar respublikamızın uşaqlarını təbrik etmiş, onlara uzun ömür, möhkəm cansağlığı, gələcəkdə ölkəmizin quruculuğunda, inkişafında uğurlar arzulamışdır.
Tədbir uşaq musiqi, incəsənət və bədii sənətkarlıq məktəbləri şagirdlərinin ümummilli lider Heydər Əliyevin anadan olmasının 86-cı ildönümünə həsr edilmiş muxtar respublika müsabiqəsinin laureatları və fərqlənən kollektivlərin konserti ilə başa çatmışdır.
######
 |
 |
 |
Bölmənin digər xəbərləri
