“Naxçıvanın muxtariyyəti tarixi nailiyyətdir” mövzusunda keçirilən interaktiv dərs maraqla qarşılanıb
Naxçıvan, 9 fevral, AZƏRTAC
AMEA Naxçıvan Bölməsində muxtar respublika məktəbliləri üçün “Naxçıvanın muxtariyyəti tarixi nailiyyətdir” mövzusunda keçirilən interaktiv dərs maraqla qarşılanıb.
Bölmənin mətbuat xidmətindən AZƏRTAC-ın Naxçıvan bürosuna bildirilib ki, Naxçıvan Muxtar Respublikasının yaradılmasının 97-ci ildönümünə həsr olunan dərsdə Bölmənin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü, professor Fəxrəddin Səfərli əvvəlcə Azərbaycanın dövlətçilik tarixinə qısa nəzər salıb. Bildirib ki, dövlətçilik tariximizdə mühüm xidmətləri olmuş Naxçıvan Azərbaycan ərazisində yaranmış bir sıra böyük və kiçik dövlət qurumlarının mərkəzi, hətta Naxçıvanşahlıq, Azərbaycan Atabəyləri dövləti, Naxçıvan xanlığı və Araz-Türk Cümhuriyyətinin paytaxtı olub. Bu dövlətçilik ənənələrinin davamı olaraq 1924-cü il fevralın 9-da yaradılmış Naxçıvan Muxtar Respublikasının da Azərbaycan dövlətçilik tarixində mühüm yeri var.
Naxçıvanın muxtariyyət statusunun çox mürəkkəb bir şəraitdə, xalqın görkəmli şəxsiyyətlərinin, xüsusilə Naxçıvan əhalisinin inadlı müqaviməti nəticəsində əldə olunduğunu diqqətə çatdıran Fəxrəddin Səfərli muxtariyyətin qazanılması ərəfəsində mövcud olan ağır ictimai və siyasi vəziyyət haqqında şagirdlərə məlumat verib. Alim mənfur ermənilər tərəfindən Bakıda, Naxçıvanda və ölkənin digər bölgələrində törədilən dəhşətli qırğınları xatırladaraq Azərbaycanın əzəli və əbədi torpaqlarına qarşı irəli sürülən ərazi iddialarından bəhs edib.
Dərsdə Naxçıvanın əlverişli coğrafi mövqeyini və strateji əhəmiyyətini məktəblilərin diqqətinə çatdıran professor Azərbaycan Xalq Cümhuriyyəti dövründə Naxçıvana göstərilən yardımlar, Araz-Türk Respublikasının yaradılması kimi önəmli mövzulara da toxunub. Qeyd olunub ki, muxtariyyət məsələsi tarixi torpağımız olan Zəngəzurun Ermənistana verilməsi ilə Naxçıvanın Azərbaycanın əsas hissəsindən ayrı salınmasından sonra zərurətə çevrilib. İnteraktiv dərs zamanı erməni millətçiləri və onların havadarlarının daim bu statusun ləğvinə çalışmaları ilə bağlı bəzi faktlara diqqət çəkən alim, muxtariyyət statusunun əhəmiyyətini şagirdlərə izah edib.
Məktəblilərə muxtariyyət statusunun verilməsində, qorunub saxlanılmasında müstəsna əhəmiyyəti olan Moskva və Qars müqavilələrinin rolundan danışan Fəxrəddin Səfərli görkəmli dövlət xadimi Behbud ağa Şahtaxtinskinin Naxçıvan, Zəngəzur və Dağlıq Qarabağ haqqında əsl həqiqətlərin sovet rəhbərliyinə çatdırılmasında və muxtariyyətin əldə olunmasındakı xidmətlərindən söz açıb.
Fəxrəddin Səfərli dərs zamanı muxtar respublikanın keçdiyi 97 illik inkişafa nəzər salaraq qeyd edib ki, ulu öndər Heydər Əliyevin hakimiyyətə gəlməsindən sonra onun prinsipiallığı və uzaqgörənliyi sayəsində Naxçıvan ağır siyasi vəziyyətdən xilas olaraq inkişafa qədəm qoydu. Bu siyasətin layiqli davamçısı olan Vasif Talıbovun Naxçıvan Muxtar Respublikası Ali Məclisinin sədri vəzifəsinə seçilməsindən sonra Naxçıvan öz inkişafının ən yüksək mərhələsinə daxil oldu. Qısa müddət ərzində muxtar respublikada sənaye, iqtisadiyyat, kənd təsərrüfatı, elm, təhsil, eləcə də inkişafın digər sahələrində müşahidə olunan yüksəliş məhz yorulmaz fəaliyyətin, yeridilən uzaqgörən siyasətin nəticəsidir. Son 25 ildə Naxçıvan Muxtar Respublikası hərtərəfli inkişafa nail olub, həyatın bütün sahələrində çox böyük dəyişikliklər baş verib. Sosial müdafiə sahəsində aparılan islahatlar, həyata keçirilən bütün tədbirlər Naxçıvan əhalisinin rifah halının yaxşılaşdırılmasına, yaşam səviyyəsinin yüksəldilməsinə xidmət edir.
“Naxçıvan Muxtar Respublikası Ali Məclisi sədrinin ümummilli lider Heydər Əliyev siyasi kursuna və siyasətinə sədaqəti, bu siyasətin Naxçıvanda uğurlu həyata keçirilməsi sayəsində inkişafın “Naxçıvan modeli” formalaşıb”, - deyən professor vurğulayıb ki, muxtar respublikada sürətli inkişaf təmin edilib, Naxçıvan bu illər ərzində ölkəmizin ən qabaqcıl və inkişaf etmiş bölgələrindən birinə çevrilib.
Bölmənin digər xəbərləri
