NAZİRLƏR KABİNETİNDƏ MÜŞAVİRƏ
Xəbər verdiyimiz kimi, yanvarın 22-də Nazirlər Kabineti “Məskunlaşmamış qaçqın və məcburi köçkünlərə güzəştlərin müavinətlə əvəz olunması ilə əlaqədar onların ödənilməsi qaydasının təsdiq edilməsi barədə” qərar qəbul etmişdir. Fevralın 1-də Nazirlər Kabinetində həmin qərarın icrası ilə əlaqədar müşavirə keçirilmişdir.
Müşavirəni baş nazirin müavini, Dövlətqaçqınkomun sədri Əli Həsənov açaraq dedi ki, bundan sonra xidmət təşkilatları ilə istehlakçılar arasında hesablaşmalar qərarda müəyyən edilmiş qaydalara əsasən aparılmalıdır.
İki gün ərzində Dövlətqaçqınkomun aparıcı mütəxəssisləri ilə birgə respublikamızın on rayonunda, 12 çadır şəhərciyində, bir neçə qəsəbədə olduğunu, məskunlaşmamış qaçqınlar və məcbuqri köçkünlərlə söhbətlər apardığını bildirən Ə.Həsənov dedi ki, “Kommunal, nəqliyyat və digər xidmətlər üzrə güzəştlərin müavinətlərlə əvəz olunmasının təmin edilməsi haqqında” Azərbaycan Prezidentinin Fərmanı və bununla əlaqədar Nazirlər Kabinetinin qərarı yerlərdə razılıqla qarşılanmışdır. Görüşlər zamanı bir daha izah olunmuşdur ki, güzəştlərin müavinətlə əvəz edilməsi həm iqtisadi cəhətdən qaçqın və köçkünlər, həm də dövlət üçün sərfəlidir.
Sonra Ə.Həsənov xidmət təşkilatlarının yığcam məskunlaşma yerlərində görəcəkləri işlərdən danışaraq dedi ki, Nazirlər Kabinetinin müəyyən etdiyi qaydalara əsasən, köçkünlərin məskunlaşdıqları rayonların icra hakimiyyətlərinin, o ərazilərdə yaşayan məcburi köçkünlərin mənsub olduqları işğal edilmiş rayonların icra hakimiyyətlərinin, xidmət təşkilatlarının və Dövlətqaçqınkomun nümayəndələri tərəfindən adbaad siyahı tərtib olunmalıdır. Yəni, hər hansı ərazidə məskunlaşmamış necə qaçqın və köçkünün yaşadığı müəyyən edilməlidir. Məskunlaşma haqqında siyahı rayonların icra hakimiyyətləri tərəfindən təsdiq edilərək Dövlətqaçqınkoma təqdim olunmalıdır. Bu siyahıların hazırlanmasında və təsdiq olunmasında xidmət təşkilatlarının nümayəndələri də iştirak etməlidirlər.
Müşavirədə respublikanın xidmət təşkilatlarının rəhbərləri çıxış edərək, görüləcək işlərlə əlaqədar öz fikir və mülahizələrini bildirdilər.
Baş nazirin müavini Yaqub Eyyubov müşavirədə iştirak edirdi.
Bölmənin digər xəbərləri
