Nəqliyyat sənədlərinin rəqəmsallaşması TRACECA üzrə beynəlxalq daşımaları asanlaşdıracaq
Bakı, 20 sentyabr, AZƏRTAC
TRACECA-nın ayrı-ayrı marşrutlarda elektron dəmir yolu yük qaiməsinin istifadəsi üzrə pilot layihənin təşkili və həyata keçirilməsi üzrə İşçi qrupunun videokonfrans formatında ilk iclası keçirilib.
AZƏRTAC TRACECA-nın saytına istinadla xəbər verir ki, pilot layihə üzrə işçi qrupunun tərkibinə beş iştirakçı ölkənin - Azərbaycan, Gürcüstan, Qazaxıstan, Türkiyə və Ukraynanın nəqliyyat, dəmir yolu operatorları, dəniz nəqliyyatı və liman operatorları, habelə gömrük orqanlarının nümayəndələri daxildir. Onlar pilot layihənin həyata keçirilməsi üzrə ilkin fəaliyyətləri müzakirə ediblər.
Pilot layihənin həyata keçirilməsi 22 may 2023-cü il tarixində imzalanmış anlaşma Memorandumu ilə nəzərdə tutulub. İşçi qrupu Dəmir Yolları arasında Əməkdaşlıq Təşkilatı (OSJD), Beynəlxalq Dəmir Yolu Nəqliyyatı Komitəsi (CIT), BMT, Avropa İqtisadi Komissiyası (ECE), BMT-nin Ticarət və Elektron Biznesin Asanlaşdırılması Mərkəzi (UN/CEFACT) ilə birgə layihəni həyata keçirən TRACECA Hökumətlərarası Komissiyasının Daimi Katibliyinin koordinasiyası ilə yaradılıb. Belə ki, 45-dən çox iştirakçının iştirak etdiyi iclasda elektron yük qaiməsinin istifadəsinin hüquqi və texniki (IT) aspektlərinin ilkin təhlili müzakirə olunub. Növbəti mərhələlərdə TRACECA dəhlizi boyunca elektron yük qaiməsinin tam tətbiqi üçün zəruri hüquqi mühitin təmin edilməsi üçün təkliflərin hazırlanması nəzərdə tutulur.
Bundan əlavə, BMT-nin Avropa İqtisadi Komissiyası ilə əməkdaşlıq şəraitində ayrı-ayrı TRACECA marşrutları üzrə elektron yük qaiməsinin istifadəsi üzrə pilot layihəyə elektron sənədinin prototipinin hazırlanması, EDIFACT/XML konverterinin inkişafı, eləcə də BMT standartlarının və proseslərin BMT-nin Ticarətin Asanlaşdırılması və Elektron Biznes Mərkəzinin ekspertləri tərəfindən hazırlanmış məlumat modellərinin istifadəsi üzrə potensial texniki dəstək təqdim olunub. Bütün fəaliyyətlər TRACECA Baş katibliyinin dəstəyi ilə Dəmir Yolları arasında Əməkdaşlıq Təşkilatı, CIT və Beynəlxalq Dəmir Yolları İttifaqı kimi beynəlxalq dəmir yolu təşkilatları ilə əlaqəli şəkildə həyata keçiriləcək.
Pilot layihə transsərhəd və milli səviyyədə e-CIM/SMGS yük qaiməsi üzrə məlumatların elektron mübadiləsi üçün mövcud və yeni hazırlanmış texniki həllərin virtual və paralel sınaqdan keçirilməsini təmin etmək məqsədi ilə növbəti iki il müddətinə planlaşdırılır ki, bu da gələcəkdə kağız sənədlərsiz dəmir yolu nəqliyyatına keçidi asanlaşdıracaq.
Dəmir yolu nəqliyyatı sənədlərinin rəqəmsallaşmasının yükdaşımaların səmərəliliyini artıracağı və TRACECA dəhlizi üzrə beynəlxalq dəmir yolu nəqliyyatının sadələşdirilməsinə töhfə verəcəyi gözlənilir.
Qeyd edək ki, CIM beynəlxalq dəmir yolu yük qaiməsi 1980-ci ilin may ayında Berndə qəbul edilmiş beynəlxalq CIM Konvensiyasına (Beynəlxalq Yük Konvensiyası) uyğun olaraq hazırlanmış yük qaiməsi formasıdır.
Bölmənin digər xəbərləri
