İDMAN
Nəzrin Hümbətova: Azərbaycan birinciliyi və Bakı çempionatı peşəkarlığımın yüksəldilməsində mühüm mərhələdir
Bakı, 25 mart, AZƏRTAC
Qadın idman gimnastikası üzrə 6-cı Azərbaycan birinciliyində və Bakı çempionatında iştirak etmək məndə bacarığıma inam yaradır və gələcək üçün gözəl başlanğıc olacaq.
AZƏRTAC xəbər verir ki, bunu yarışın iştirakçısı Nəzrin Hümbətova bildirib.
Yarışa hazırlığın asan olmadığını vurğulayan gimnastımız deyib: “Düşünürəm ki, Azərbaycan birinciliyi və Bakı çempionatı peşəkarlığımın yüksəldilməsində mühüm mərhələdir. Milli Gimnastika Arenasında ilk dəfə deyil ki, çıxış edirəm. Buradakı yarışlar həmişə məndə özümə inam yaradır”.
“Yeddi ildir gimnastika ilə məşğul oluram. Gələn həftə Bakıda idman gimnastikası üzrə dünya kuboku yarışları başlayır. Yarışları mütləq izləyəcəyəm və ölkəmizin təmsilçiləri - Samirə Qəhrəmanova və Milana Minakovskayanı dəstəkləyəcəyəm”, - deyə gənc gimnast əlavə edib.
Xatırladaq ki, martın 26-dək davam edəcək yarışlarda “Ocaq Sport”, Bakı Gimnastika Məktəbi, Sumqayıt Olimpiya İdman Kompleksi, Sumqayıt İxtisaslaşdırılmış Olimpiya Ehtiyatları Uşaq Gənclər İdman Məktəbi və Balakəni təmsil edən 79 idmançı qüvvəsini sınayır.