NİKOLAY BAYBAKOVA “İSTİQLAL” ORDENİ TƏQDİM EDİLMİŞDİR
Təntənəli mərasimdə Azərbaycan Baş nazirinin birinci müavini Abbas Abbasov, ölkəmizin Rusiyadakı səfiri Polad Bülbüloğlu, Moskvanın meri Yuri Lujkov, Rusiyanın iqtisadi inkişaf naziri German Qref, Rusiyanın Ukraynadakı səfiri Viktor Çernomırdin, məşhur neftçi Fərman Salmanov və Rusiyanın neft-qaz kompleksinin nümayəndləri, Dövlət Dumasının, Federasiya Şurasının deputatları, müxtəlif dövlətlərin səfirləri və bir sıra regionlardan gəlmiş rusiyalılar iştirak etmişlər. Yubilyarın ünvanına xoş sözlər və təbriklər söylənilmiş, ona xatirə hədiyyələri təqdim edilmişdir.
Lakin Nikolay Baybakovun yubileyinə sözün həqiqi mənasında dəyərli hədiyyəni Azərbaycan Prezidenti İlham Əliyev hazırlayaraq, onu Vətənimizin ali mükafatı - “İstiqlal” ordeni ilə təltif etmişdir. Dövlətimizin başçısının tapşırığı ilə ordeni yubilyara Baş nazirin birinci müavini Abbas Abbasov təqdim etmişdir. O, N.Baybakovun Azərbaycan Respublikası ilə Rusiya Federasiyası arasında dostluq əlaqələrinin inkişafındakı böyük xidmətlərinə görə”İstiqlal” ordeni ilə təltif edilməsi haqqında Prezidentimizin 2006-cı il 3 mart tarixli Sərəncamını oxumuşdur.
A.Abbasov çıxışında Nikolay Konstantinoviçi 95 illiyi münasibətilə təbrik etmiş, ona cansağlığı və firavanlıq arzulamışdır. O demişdir: “Əfsanəvi insan kimi sizin həyatınız tarixi hadisələrlə zəngindir. Lakin mən xüsusi vurğulamaq istərdim ki, həyatınızın əsas məqamları görkəmli dövlət xadimi və siyasi xadim, Azərbaycanın ümummilli lideri Heydər Əliyevlə bağlıdır. Ümummilli liderimiz təkcə o vaxtkı böyük ölkəmizin inkişafı üçün deyil, həm də öz vətəni Azərbaycan üçün böyük işlər görmüş insan kimi sizə çox hörmət edir, sizi qiymətləndirir və sevirdi. Sizin kimi adamların sayəsində Azərbaycan və Rusiya həmişə dost və tərəfdaş olacaqlar”.
N.Baybakov 1911-ci il martın 6-da Bakıda doğulmuşdur. 1932-ci ildə Azərbaycan Neft İnstitutunu mədən mühəndisi ixtisası üzrə bitirmişdir. Sonra keçmiş “Leninneft” NQÇİ-də mədən müdiri, bu idarənin rəhbəri olmuşdur. O, sovet hökumətində yüksək vəzifələrdə çalışmış, müharubə illərində isə cəbhənin və arxanın yanacaqla təmin edilməsi üzrə Dövlət Komitəsinin müvəkkili işləmişdir. N.Baybakov Bakının neft mədənlərində sıravi mühəndis vəzifəsindən keçmiş SSRİ Nazirlər Soveti sədrinin müavini vəzifəsinədək böyük yol keçmiş, geniş şöhrət qazanmışdır. O, yüksək əmək nailiyyətlərinə görə Sosialist Əməyi Qəhrəmanı adına layiq görülmüş, altı Lenin ordeni, Oktyabr inqilabı ordeni, iki Qırmızı Əmək Bayrağı ordeni və çoxlu medallar ilə təltif edilmişdir. N.Baybakov keçmiş sosialist ölkələrinin – Bolqarıstan, Polşa, ADR və Çexoslovakiyanın da yüksək ordenlərinə layiq görülmüşdür. O, Lenin mükafatı laureatıdır.
“Sovet iqtisadiyyatının patriaxı”nı və neft-qaz sənayesinin “xaç atası”nı – Baybakovu belə adlandırırlar – Rusiya Prezidenti Vladimir Putin də teleqram göndərərək təbrik etmişdir.
Nikolay Konstantinoviç Baybakov “İstiqlal” ordeninə görə Azərbaycan Prezidentinə təşəkkür etmiş, jurnalistlərə müsahibəsində isə demişdir ki, Azərbaycanda uzun illər işləmiş insan üçün bu, böyük mükafatdır. Sağ olsun Azərbaycan! Ürəkdən arzu edirəm ki, Azərbaycan daim yeni uğurlara doğru irəliləsin. O, Prezident İlham Əliyevə öz dahi atası Heydər Əlirza oğlu Əliyevin şanlı ənənələrini daim davam etdirməyi arzulamışdır.
Bölmənin digər xəbərləri
