“Nizami Gəncəvi yaradıcılığı: mənəvi dəyərlər və vətənpərvərlik” mövzusunda onlayn esse müsabiqəsinin qalibləri mükafatlandırılıb
Bakı, 1 iyun, AZƏRTAC
Gənclər və İdman Nazirliyi və Azərbaycan Yazıçılar Birliyi tərəfindən “Nizami Gəncəvi yaradıcılığı: mənəvi dəyərlər və vətənpərvərlik” mövzusunda keçirilən onlayn esse müsabiqəsinin qalibləri mükafatlandırılıb.
Nazirliyin mətbuat xidmətindən AZƏRTAC-a bildiriblər ki, müsabiqənin əsas məqsədlərindən biri Nizami Gəncəvi yaradıcılığının gənclər arasında geniş təbliği, vətənpərvərlik tərbiyəsi işinin gücləndirilməsi, istedadlı və yaradıcı gənclərin stimullaşdırılması olub.
Azərbaycan Respublikasında 2021-ci ilin “Nizami Gəncəvi İli” elan edilməsi haqqında Prezident İlham Əliyevin yanvarın 5-də imzaladığı Sərəncamın və dövlətimizin başçısının 2017-ci il 15 sentyabr tarixli Sərəncamı ilə təsdiq edilmiş “Azərbaycan gəncliyi 2017-2021-ci illərdə” Dövlət Proqramının müvafiq yarımbəndinin icrasının təmin edilməsi məqsədilə keçirilən onlayn esse müsabiqəsi gənclər tərəfindən böyük maraqla qarşılanıb. Təqdim edilən çoxsaylı esselərdə də bu maraq özünü təsdiqləyib.
Azərbaycan Yazıçılar Birliyinin təqdimatı əsasında yaradılan münsiflər heyətinin üzvləri - İlqar Fəhmi, Tərlan Quliyev və Arif Buzovnalı tərəfindən müsabiqə şərtlərinə uyğun olaraq qeydiyyatdan keçən 101 gəncin hazırladığı esselər qiymətləndirilib, müsabiqənin qalibləri və fərqlənənlər müəyyən edilib.
İlk onluğa layiq görülənlər arasından I, II və III yerlərin qalibləri və 7 nəfər fərqlənən gənc seçilib.
Mükafatlandırma mərasimində iştirak edən gənclər və idman nazirinin müavini İntiqam Babayev layihənin məqsədi və əhəmiyyəti barədə məlumat verib, Nizami Gəncəvi yaradıcılığına müraciət edən gənclərin hər birinə fəal iştiraklarına görə təşəkkürünü bildirib, qalibləri təbrik edərək onlara uğurlar arzulayıb.
Münsiflər heyəti adından çıxış edən Azərbaycan Yazıçılar Birliyinin katibi İlqar Fəhmi müsabiqənin əhəmiyyətini yüksək dəyərləndirib.
Sonra müsabiqədə I yerin qalibi Günel Əhmədova, II yerin qalibi Mərdan Həsənov və III yerin qalibi Şahin Yusifli diplom və pul mükafatları, fərqlənənlər - Vüsalə Seyfullayeva, Şəbnəm Hüseynova, Ləman Quliyeva, Nurlan Quliyev, Firuzə Hüseynova, Sona Salahova və Etibar Zamanlı isə fəxri fərman və hədiyyələrlə mükafatlandırılıblar.
Bölmənin digər xəbərləri
