Olimpiada və sülh rəmzi olan göyərçinlər
Bakı, 3 mart, AZƏRTAC
Dünyanın möhtəşəm idman hadisələrindən olan Olimpiya oyunları rəngarəngliyi, bənzərsizliyi ilə fərqlənir. Dörd ildən bir keçirilən Olimpiya oyunları öz ritualları, mərasimləri ilə diqqət çəkir.
AZƏRTAC-ın araşdırmasına görə, əvvəllər Olimpiya oyunlarının mərasimlərində sülh rəmzi olan göyərçinlərdən istifadə olunub. 1920-ci ildə Belçikanın Antverpen şəhərində keçirilən VII Yay Olimpiya Oyunlarında ev sahibləri göyərçinlərlə bağlı qeyri-adi üsuldan istifadə ediblər.
Belə ki, Antverpen-1920 Təşkilat Komitəsi göyərçinlərin ayağına yarış iştirakçısı olan ölkələrin milli koloritini ifadə edən lentlər bağlayıblar. Lakin 1988-ci ildə Cənubi Koreyanın Seul şəhərində keçirilən Olimpiya oyunlarında baş verən hadisə təntənəli mərasimlərdə göyərçinlərdən istifadə olunmasına son qoyub. Olimpiadanın açılış mərasimində Olimpiya odunun alovlandırılacağı çənin qıraqlarına çoxlu sayda göyərçin qonmuşdu. Məşəli alovlandıran Son Ki Çinq əlindəki odla ora yaxınlaşdıqda quşların əksəriyyəti pərvazlanaraq göyə qalxıb. Lakin onlardan bir neçəsi uçmadığından diri-diri alovda yanıb. Bu hadisədən sonra heyvansevərlər Beynəlxalq Olimpiya Komitəsinə məktubla müraciət edərək olimpiadada göyərçinlərdən istifadə olunmamasını xahiş ediblər. Çıxılmaz vəziyyətdə qalan BOK bundan sonra göyərçinlərin xilas edilməsinə rəmzi məna verilməsi barədə qərar qəbul edib.
Bölmənin digər xəbərləri
