Ölkəmizdə insan hüquq və azadlıqlarının təmin edilməsi daim diqqətdədir
Bakı, 7 dekabr, AZƏRTAC
Bakı Dövlət Universitetinin Hüquq fakültəsində 10 dekabr - Beynəlxalq İnsan Hüquqları Gününə həsr edilmiş tədbir keçirilib.
AZƏRTAC xəbər verir ki, tədbir Hüquq fakültəsi ilə Ədliyyə Nazirliyinin birgə təşkilatçılığı ilə reallaşıb.
Tədbiri açan universitetin Hüquq fakültəsinin dekanı Zaur Əliyev bildirib ki, Azərbaycanda insan hüquqlarının inkişafı siyasətinin əsası ümummilli lider Heydər Əliyev tərəfindən qoyulub. Ulu Öndərin həmişə insan hüquqlarının müdafiəsinə xüsusi önəm verdiyini vurğulayan dekan Azərbaycanda insan hüquqları sahəsində ilk dövlət proqramının məhz xalqımızın ümummilli lideri Heydər Əliyev tərəfindən təsdiq edildiyini qeyd edib. Fakültə dekanı Prezident İlham Əliyevin uğurla həyata keçirdiyi insan hüquqları siyasətinin artıq milli strategiya kimi formalaşdığını, dövlət başçısı tərəfindən təsdiq edilmiş insan hüquqlarına dair Milli Fəaliyyət Planı və Proqramının insan hüquqları sahəsində yeni inkişaf mərhələsinin əsasını qoyduğunu, Birinci vitse-prezident Mehriban Əliyevanın insan hüquqlarına, xüsusilə də uşaq hüquqlarına olan diqqətinin bu sahəyə qayğının daha da artmasına səbəb olduğunu qeyd edib.
Ədliyyə Nazirliyinin İnsan hüquqları və kommunikasiya idarəsinin rəisi Aynur Sabitova tədbir iştirakçılarına ədliyyə sahəsində insan hüquq və azadlıqlarının təmin edilməsi və müdafiəsi istiqamətində həyata keçirilən tədbirlərdən, bu sahədə yerli və beynəlxalq qeyri-hökumət hüquq müdafiə təşkilatları ilə əməkdaşlıqdan, insan hüquqlarının müdafiəsi istiqamətində həyata keçirilən hüquqi maarifləndirmə işlərindən ətraflı bəhs edib.
Milli Məclisin deputatı Bəhruz Məhərrəmov dövlətin insan hüquqlarının müdafiəsi istiqamətində həyata keçirdiyi tədbirlərdən, bu sahədə qəbul edilən normativ hüquqi aktlardan, ümumiyyətlə bütün normaların əsas məqsədinin insan hüquqlarının təmin edilməsi olmasından danışıb.
Ombudsman Aparatının rəhbəri Aydın Səfixanlı İnsan hüquqları üzrə müvəkkilin insan və vətəndaş hüquqlarının və azadlıqlarının təmin edilməsi sahəsində həyata keçirdiyi tədbirlər və beynəlxalq əməkdaşlıq əlaqələrindən bəhs edib.
Hüquq və İnsan Haqları İnstitutunun idarə heyətinin sədri Məhəmməd Quluzadə insan hüquqlarının təmin edilməsi istiqamətində həyata keçirilən fəaliyyətlə tədbir iştirakçılarını tanış edib.
Mediasiya Şurası idarə heyətinin sədri Nadir Adilov mediatorların tərəflər arasında mübahisələrin məhkəməyədək həllində həyata keçirdikləri fəaliyyətdən və onların məhkəmələrin yükünün azaldılması ilə yanaşı, tərəflər arasında maarifləndirici funksiyasını tədbir iştirakçılarının diqqətinə çatdırıb. Vəkillər Kollegiyasının sədr müavini Şahmar Məmmədov kollegiyanın üzvləri tərəfindən işğaldan azad edilmiş rayonlarda və Azərbaycanın müxtəlif rayon və ərazilərində yaşayan vətəndaşlara təmənnasız göstərilən hüquqi müdafiə vasitələrindən bəhs edib, tədbir iştirakçılarına bu ənənənin davam etdirilməsində kollegiyanın maraqlı olduğunu bildirib.
Hüquq fakültəsinin İnsan hüquqları və informasiya hüququ UNESCO kafedrasının müəllimi Günay Hacıyeva kafedranın fəaliyyəti, fakültədə insan hüquqlarının tədrisi prosesi haqqında məlumat verib. Fakültənin 2-ci kurs tələbəsi Cəfər Məmmədov Hüquq fakültəsi ilə Ədliyyə Nazirliyinin birgə həyata keçirdikləri “Ədliyyə ayı” çərçivəsində tələbələrin nazirliyin müxtəlif struktur bölmələrində həyata
keçirilən işlə tanış olmaları üçün yaratdıqları şəraitə görə ədliyyə naziri Fikrət Məmmədova tələbələr adından təşəkkür edib.
Sonda dekan Zaur Əliyev çıxış edərək bildirib ki, artıq bir neçə ildir İnsan hüquqları gününü qalib dövlətin qürurlu vətəndaşları kimi qeyd edirik. Müzəffər Ali Baş Komandan İlham Əliyevin bilavasitə rəhbərliyi ilə qəhrəman Azərbaycan Ordusunun işğal altında olan əraziləri azad etdiyini, ərazi bütövlüyümüzün bərpa olunduğunu qeyd edən dekan Prezident İlham Əliyevin və Birinci vitse-prezident Mehriban Əliyevanın Qarabağ və Şərqi Zəngəzura səfərlərinin işğaldan azad olunmuş ərazilərimizin sürətlə bərpa edildiyini bütün dünyaya nümayiş etdirdiyini vurğulayıb.
Tədbirdə, həmçinin Hüquq fakültəsi tələbələrinin 10 dekabr - Beynəlxalq İnsan Hüquqları Günü münasibətilə hazırladığı videoçarx nümayiş etdirilib.
Bölmənin digər xəbərləri
