Ölkəmizə idxal edilən quru albuxara məhsulunda kif göbələkləri aşkarlanıb
Bakı, 23 fevral, AZƏRTAC
Qida Təhlükəsizliyi Agentliyi tərəfindən ölkəyə idxal olunan qida məhsullarına nəzarət tədbirləri davam etdirilir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, həyata keçirilən nəzarət tədbirləri çərçivəsində İran İslam Respublikasında fəaliyyət göstərən “Trading Mırebrahım Seyed Alaei” müəssisəsi tərəfindən istehsal olunan və fiziki şəxs Nuriyev Ariz Arzuman oğlu tərəfindən ölkəmizə idxal edilən 2,75 ton qurudulmuş albuxara məhsuluna baxış keçirilib.
Baxış zamanı idxal olunan məhsuldan nümunələr götürülərək Qida Təhlükəsizliyi İnstitutunun müvafiq laboratoriyasına təqdim olunub. Müayinələr nəticəsində məhsullarda kif göbələkləri aşkarlanıb.
Agentlik tərəfindən istehlaka yararsız məhsulların satış şəbəkəsinə daxil olunmasının qarşısı alınıb. Hazırda qanunvericiliyin tələbləri çərçivəsində müvafiq tədbirlər görülür.
Bölmənin digər xəbərləri
