Bakı, 23 sentyabr, AZƏRTAC

Azərbaycan Respublikasının Qarabağ iqtisadi zonasında yaşayan erməniəsilli sakinlərin nümayəndələrinin təmaslar üzrə məsul şəxslə Yevlax şəhərində keçirilən görüşünü təqdirəlayiq hesab edirik. Multikultural və tolerant dövlət olan Azərbaycan milliyyətindən, dinindən, dilindən, irqindən və digər mənsubiyyətindən asılı olmayaraq hər bir vətəndaşının, o cümlədən Qarabağda yaşayan erməniəsilli vətəndaşlarının beynəlxalq sənədlərdə və milli qanunvericilikdə təsbit olunmuş hüquq və azadlıqlarının müdafiəsinə təminat verməklə yanaşı, bu hüquq və azadlıqların inkişafına xüsusi diqqət yetirir.

AZƏRTAC xəbər verir ki, bu barədə Qarabağda yaşayan erməniəsilli sakinlərin təmaslar üzrə məsul şəxslə Yevlax şəhərində keçirilən görüşünə dair ombudsman Səbinə Əliyevanın açıqlamasında deyilib.

“Azərbaycan Respublikasının İnsan Hüquqları üzrə müvəkkili olaraq, bu kimi təmasların, nəhayət bölgəmizdə sülhün təmin olunmasına və inkişafa, Qarabağ iqtisadi zonasında yaşayan erməniəsilli vətəndaşlarımızın hüquq və azadlıqlarının daha səmərəli müdafiəsinə mühüm töhfə verəcəyinə inanır, gələcəkdə birgə yaşayış üçün münbit şəraitin yaradılması baxımından yüksək qiymətləndirirəm”, - deyə açıqlamada bildirilib.