“OPUS DEİ” TƏŞKİLATI “DA VİNÇİ KODU” İLƏ MÜBARİZƏYƏ BAŞLAMIŞDIR

20.05.2006 [21:50]
Çap et
A⁺ A^-

AZƏRTAC İTAR-TASS agentliyinə istinadla xəbər verir ki, katoliklərin mühafizəkar “Opus Dei” təşkilatı yazıçı Den Braunun “Da Vinçi kodu” əsərinin motivləri əsasında çəkilmiş eyniadlı filmdəki tarixi yalanları və cəfəngiyatı ifşa etmək kampaniyasına başlamışdır. Mühafizəkar katoliklər İsa Məsih təliminin guya kilsə tərəfindən təhrif olunması və sonradan Leonardo da Vinçi tərəfindən bərpa edilməsi barədə kitabda irəli sürülən başlıca tezislə razılaşmırlar. Mötəbər katolik təşkilatı sayılan “Opus Dei” Braunun kitabında qatı mövhumatçı təriqət kimi təsvir edilmişdir.

Filmin İtaliyada ilk nümayişində kinoteatrlar tamaşaçılarla dolu olmuşdur. Verona kinoteatrlarından birinin qarşısında ənənəçi katoliklərin etiraz nümayişi keçirilmişdir. Bu günlərdə isə bir neçə müəllifin yazdığı “Da Vinçi kodu: yalan və tarixi saxtalaşdırmalar” kitabı satışa çıxarılmışdır. Den Braunun kitabda təsvir etdiyi yeganə real adam, italiyalı mühəndis Mauritsio Seraçini müəlliflər arasındadır. Təkzibedici kitabın müəllifləri “Da Vinçinin kodu”nu “səhvlər komediyası” adlandırırlar. Onlardan biri, İtaliya tarixçisi Franko Kardini demişdir: “Ümidvaram ki, Den Braun tezliklə unudulacaq və kitabın satışı hüququndan əldə etdiyi 300 milyon dollardan sakitlikdə zövq alacaqdır”.

“OPUS DEİ” TƏŞKİLATI “DA VİNÇİ KODU” İLƏ MÜBARİZƏYƏ BAŞLAMIŞDIR

MÜƏLLİFLƏ ƏLAQƏ

Bölmənin digər xəbərləri