Bakı, 28 sentyabr, AZƏRTAC

İstehlakçıların hüquqlarının qorunmasında inzibati tədbirlərlə yanaşı, istehlakçıların, xüsusilə də sahibkarların maarifləndirilməsi və digər dəstək tədbirlərinın həyata keçirilməsi çox böyük əhəmiyyət kəsb edir. Bununla əlaqədar keyfiyyətli və müvafiq standartlara cavab verən məhsul və xidmətlərin istehlakçılara təqdim edilməsi məqsədilə KOBİA tərəfindən istehsal və xidmət sektorunda fəaliyyət göstərən sahibkarlıq subyektləri üçün müxtəlif maarifləndirici görüş, təlim, seminar və digər bu kimi tədbirlər təşkil edilir.

AZƏRTAC xəbər verir ki, bu barədə KOBİA-nın İdarə Heyətinin sədri Orxan Məmmədov deyib.

O bildirib ki, bu dəstək və xidmətlər KOBİA-nın ölkənin müxtəlif şəhər və rayonlarını əhatə edən geniş infrastruktur şəbəkəsi - KOB dostları, KOB inkişaf mərkəzləri və KOB evləri vasitəsilə həyata keçirilir. KOB inkişaf mərkəzləri KOB-ların bilik və bacarıqlarını artırmaq üçün ödənişsiz olaraq informasiya, məsləhət, təlim xidmətlərini təklif edir.

Bununla yanaşı, sıralarında 15 vətəndaş cəmiyyəti institutunu və biznes assosiasiyaları birləşdirən KOBİA yanında İctimai Şura fəaliyyət göstərir. İctimai Şuranın məqsədi Agentlikdə ictimai iştirakçılığın gücləndirilməsi, biznesin inkişafı ilə bağlı görülən tədbirlər və KOBİA-nın fəaliyyəti üzərində ictimai nəzarətin təmin olunması, Agentliklə ictimaiyyət, o cümlədən biznes ictimaiyyəti arasında qarşılıqlı əlaqələrin genişləndirilməsidir. İstehlakçı hüquqlarının qorunmasında iştirak KOBİA yanında İctimai Şuranın əsas fəaliyyət gündəliyinə daxil olan məsələlərdən biridir və bu istiqamətində müxtəlif tədbirlər təşkil olunur.

"Ümidvaram ki, bu gün təşkil olunan tədbirdən həm dövlət orqanları, həm də sahibkarlar və digər maraqlı tərəflər məmnun qalacaq. Qazanılacaq təcrübə azad rəqabət mühitinin, istehlakçıların hüquqlarının qorunmasının daha da təkmilləşdirilməsinə, eləcə də bu sahədə biznes subyektlərinin aidiyyəti dövlət orqanları ilə əlaqələrinin genişləndirilməsinə xidmət edəcək. Düşünürəm ki, əsası Ulu Öndər Heydər Əliyev tərəfindən qoyulmuş iqtisadi inkişaf konsepsiyasının reallaşdırılması ölkəmizdə dayanıqlı iqtisadiyyatın möhkəmlənməsinə müsbət təsirini daim göstərəcək", - deyə O.Məmmədov qeyd edib.