Ötən gün İtaliyaya dəniz yolu ilə 1175 mühacir gəlib
Roma, 9 mart, AZƏRTAC
Son 24 saat ərzində Siciliyanın cənubundakı Lampeduza adasına dəniz yolu ilə 1175 miqrant qəbul edilib.
AZƏRTAC xəbər verir ki, azyaşlılar və qadınlar da daxil olmaqla, ümumilikdə 705 miqrantın olduğu 17 qayıq gecə saatlarında adadakı limana yan alıb. İtaliyanın sahil mühafizəsi xidmətinin əməkdaşları, həmçinin 13 kiçik qayıqdan 470 miqrantı xilas ediblər. Onların Çad, Suriya, Sudan, Yəmən, Seneqal, Mali, Qvineya, Burkina Faso, Kamerun, Fil Dişi Sahili, Liberiya və Qambiya vətəndaşları olduğu bildirilir.
Bundan başqa, İtaliya sularında mühacirləri daşıyan qayıq batıb. Sahil mühafizəsi xidmətinin əməkdaşları ümumilikdə 20 miqrantı xilas edib və bir qadının cəsədini sudan çıxarıblar. Qəzaya uğrayan daha bir qayıqdan isə biri azyaşlı və 11-i qadın olmaqla, 38 miqrant xilas edilib.
İtaliya son illərdə Şimali Afrikadan Avropaya qeyri-qanuni miqrasiya yollarından birinə çevrilib. Keçən il İtaliyaya dəniz yolu ilə 105 mindən çox miqrant gəlib.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
