Ötən il Küveytə ixracat iki dəfə artıb
Bakı, 30 yanvar, AZƏRTAC
Ötən il Azərbaycanın Küveytə ixracı iki dəfə artıb.
İxracın və İnvestisiyaların Təşviqi Agentliyindən (AZPROMO) AZƏRTAC-a bildirilib ki, Küveyt Dövlətinin ölkəmizdəki səfiri Abdullah Mohamed Abdullah Almaudi ilə görüş keçirilib.
AZPROMO-nun rəhbəri Yusif Abdullayev ölkəmizdə tətbiq olunan biznes və investisiyaların təşviqi mexanizmləri, bu sahədə agentliyin fəaliyyəti, sahibkarlara göstərilən dəstək tədbirləri barədə məlumat verib, iki ölkənin iş adamları arasında biznes forum və işgüzar görüşlərin təşkil olunmasını təklif edib.
Səfir Abdullah Mohamed Abdullah Almaudi qarşılıqlı ticarətin və investisiyaların artırılması üçün potensialı qeyd edib, iki ölkənin biznes dairələri arasında əlaqələrin genişləndirilməsinin əhəmiyyətini vurğulayıb.
Görüşdə iqtisadiyyatın müxtəlif sahələrində əməkdaşlıq perspektivlərinə dair fikir mübadiləsi aparılıb, qarşılıqlı informasiya mübadiləsinə dair razılıq əldə olunub.
Qeyd edək ki, ötən il Azərbaycanın Küveytlə ticarət dövriyyəsi, o cümlədən Azərbaycanın Küveytə ixracı 2 dəfə artıb. İxracın dinamikası hesabına ticarət dövriyyəsinin müsbət saldosunda da 2 dəfəyədək artım qeydə alınıb.
Bölmənin digər xəbərləri
