Ötən il ölkədə 1636 yol-nəqliyyat hadisəsi qeydə alınıb
Bakı, 22 yanvar, AZƏRTAC
Ötən il ərzində respublika üzrə qeydə alınan yol-nəqliyyat hadisələrinin sayı 2022 illə müqayisədə 1,9 faiz azalaraq 1636 olub. Onlardan 941-i, başqa sözlə 57,5 faizi sutkanın gecə və ala-toranlıq vaxtında baş verib. Nəticədə 591 nəfər ölüb, 718 nəfər isə yaralanıb.
Baş Dövlət Yol Polisi İdarəsinin mətbuat xidmətindən AZƏRTAC-a verilən məlumata görə, qəzaların 649-u piyada vurma hadisəsi ilə bağlıdır. Bu isə ümumi yol-nəqliyyat hadisələrinin 39,7 faizini təşkil edir. Piyadaların vurulması ilə nəticələnən qəzaların mütləq əksəriyyəti məhz sutkanın qaranlıq vaxtı, yaxud məhdudiyyətli görünmə şəraitində baş verib.
Bu statistikanın formalaşmasına sürücü səhlənkarlığı, yolun hərəkət hissəsinin qeyri-kafi işıqlandırılması və digər amillərlə yanaşı, bilavasitə piyadaların özlərinin yol hərəkəti qaydalarına etinasızlığı, həyat və sağlamlıqlarına biganə münasibəti az təsir göstərmir.
İdarə bir daha piyadalara müraciət edərək onlardan sutkanın qaranlıq vaxtı, eləcə də məhdudiyyətli görünmə şəraitində əlvan və ya işıqqaytarıcı elementləri olan geyim və əşyalardan istifadəyə üstünlük verməyi xahiş edir və hər kəsi bu sahədə ictimai iştirakçılığa töhfə verməyə çağırır.
Bölmənin digər xəbərləri
