Özbəkistanlı gənclər Bakıda çıxış ediblər
Bakı, 22 sentyabr, AZƏRTAC
Bakıda Özbəkistan Respublikasının Məktəbəqədər və Məktəb Təhsili Nazirliyinin nümayəndə heyəti və gənc istedadların iştirakı ilə mədəni tədbir keçirilib.
AZƏRTAC xəbər verir ki, səfər gənclərin yaradıcılıq nailiyyətlərini təqdim etmək və iki ölkə arasında mədəni-maarif əlaqələrini gücləndirmək məqsədi daşıyıb.
Bu il Özbəkistan ilə Azərbaycan arasında diplomatik münasibətlərin 30 illiyi münasibətilə Daşkənd və Buxaradan olan qaliblərə Bakıya fəxri ezamiyyət təqdim olunub ki, bu da onların nailiyyətlərinə göstərilən etimadın ifadəsidir. Ötən il Türkiyəyə səfər edən qaliblərin, bu il qardaş Azərbaycanın paytaxtına səyahətlə mükafatlandırılması iki ölkənin yaxınlığını bir daha vurğulayıb. Bakı şəhər Tahir Həsənov adına 23 nömrəli tam orta məktəbdə gənc sənətçilərin öz adət-ənənələrini və mədəniyyətlərini nümayiş etdirdikləri unudulmaz görüş keçirilib. Uşaqlar özbək yazıçısı Şərof Boşbekovun “Eski şəhər qavroşları” tamaşasından parçaları, eləcə də Özbəkistanın milli musiqi və mahnılarını ifa ediblər.
Azərbaycan Respublikası Milli Məclisinin deputatı, Mədəniyyət komitəsinin sədr müavini, Özbəkistanın Azərbaycandakı mədəniyyət elçisi Günay Əfəndiyeva bildirib ki, bu gün Bakıda səhnəyə çıxanlar təkcə gənc sənətçilər deyil – onlar özləri ilə özbək ruhunun bir parçasını da gətiriblər. O, əlavə edib ki, bu uşaqlar bizim gələcəyimizdir və belə layihələr vasitəsilə biz zaman və məsafədən asılı olmayan möhkəm dostluq təməlləri qururuq.
Azərbaycan təhsil nazirinin müavini Həsən Həsənli Özbəkistan nümayəndə heyətinə minnətdarlığını bildirərək deyib: “Biz Özbəkistan mədəniyyətinə dərin hörmətlə yanaşırıq. Bu, zəngin və özünəməxsus bir sivilizasiyadır və bizi əsrlər boyu davam edən dostluq əlaqələri birləşdirir. Bugünkü tədbir isə bizim ortaq evimizin daha bir kərpicidir — burada hörmət, əməkdaşlıq və ənənələrə sədaqət hökm sürür”.
Özbəkistanın Azərbaycandakı səfiri Bəhram Əşrəfxanov gənclərin təşəbbüslərinin diplomatik münasibətlərdəki rolundan bəhs edib: “Biz daim strateji tərəfdaşlıqdan və xalqlarımızın qardaşlığından danışırıq. Amma məhz bu cür tədbirlər vasitəsilə bu sözlər canlı və mənalı məzmun qazanır. Buxara və Daşkənddən gələn uşaqlar təkcə sənəti yox, dostluğu da gətiriblər. Əminəm ki, bu dostluq yaşayacaq və inkişaf edəcək. Bu səfər sadəcə bir mədəni missiya deyil, həm də təhsil və sənətin xalqları birləşdirmək gücünün simvoludur. Özbəkistan Prezidenti tərəfindən irəli sürülən davamlı dəstək və islahatlar sayəsində gənclər intellektual və yaradıcılıq potensiallarını üzə çıxarmaq, milli və ümumbəşəri dəyərlər ruhunda tərbiyə almaq imkanı qazanırlar”.
Görüş dostluq mübadiləsi, teatr və musiqi proqramları ilə yadda qalıb.
Bölmənin digər xəbərləri
