Pakistanda baş verən güclü zəlzələ Azərbaycanda hiss olunmayıb
Bakı, 26 oktyabr, AZƏRTAC
Pakistanda baş verən güclü zəlzələnin Azərbaycana heç bir təsiri olmayıb. Bəzi kütləvi informasiya vasitələrində bu barədə məlumat yayılsa da, bunun əsası yoxdur.
Bunu AZƏRTAC-a Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin direktoru Qurban Yetirmişli bildirib.
“Bu gün yerli vaxtla saat 07:08-də yalnız Tovuz rayonu ərazisində zəlzələ baş verib ki, o da hiss olunmayıb. Bu barədə mərkəzin saytına məlumat yerləşdirilib”, - deyə Q.Yetirmişli bildirib.
Qeyd edək ki, oktyabrın 26-da Pakistanda yerli vaxtla saat 12.10-da 7,7 bal gücündə zəlzələ baş verib. Zəlzələnin episentrinin Əfqanıstanda olduğu bildirilir. Zəlzələ Hindistan, Qazaxıstan, Qırğızıstan, Tacikistan və Özbəkistanda da qeydə alınıb.
Bölmənin digər xəbərləri
