PAMBIQ YIĞIMI DAVAM EDİR

02.11.2005 [23:05]
Çap et
A⁺ A^-

Dövlət Statistika Komitəsindən AZƏRTAC-a bildirmişlər ki, tarlalarda pambıq məhsulu yığımı başa çatmaq üzrədir. Operativ məlumatlara görə, oktyabrın 31-dək pambıq sahələrindən 176,6 min ton və yaxud keçən ilin müvafiq dövrünə nisbətən 50,6 min ton çox məhsul yığılıb emal müəssisələrinə təhfil verilmişdir. İlkin hesablamalara görə, respublika üzrə hər hektardan orta hesabla hələlik 15,6 sentner məhsul toplanmışdır.

Bir sıra bölgələrdə məhsuldarlıq göstəriciləri respublika səviyyəsindən daha yüksək olmuşdur. Məsələn Bərdə rayonunun təsərrüfatlarında hər hektardan orta hesabla 21 sentner, İmişlidə 19,9 sentner, Saatlıda 19,1 sentner, Beyləqanda 18,1 sentner, Tərtərdə 17,6 sentner məhsul götürülmüşdür.

Pambıq istehsalı Saatlı rayonunda 34 min tona, Sabirabadda 17,9 min tona, İmişlidə 17,3 min tona, Bərdədə 14, 8 min tona, Biləsuvarda 14,5 min tona çatmışdır.

Ümumiyyətlə, respublika üzrə pambıqçılıqla məşğul olan rayonların hamısında istehsalın səviyyəsi keçən ilin müvafiq dörünə nisbətən yüksək olmuşdur.