PARİSDƏ AZƏRBAYCANA HƏSR OLUNMUŞ KONFRANS KEÇİRİLMİŞDİR
Konfransı səfir Bernar Dorən giriş sözü ilə açmış, Paris-4 Universitetinin doktorantı Emil Kərimov “Azərbaycan Xalq Cümhuriyyətinin tarixi irsi”, Siyasi Tədqiqatlar Məktəbinin əməkdaşı Patrik Dombrovski “Azərbaycan və onun coğrafi siyasət mühiti”, Fransa-Azərbaycan Ticarət Palatasının prezidenti Jan Rore “Azərbaycan böyük transregional layihələrin kəsişmə nöqtəsində”, “Kollize” jurnalının baş redaktoru Erve Kole “Cənubi Qafqazda həllini tapmamış münaqişələr”, xarici işlər nazirliyinin əməkdaşı Oreli Bonel “Avropa Birliyinin Cənubi Qafqazda rolu”, Ölkələrin Öyrənilməsi, İnkişafa Yardım və Strateji Araşdırmalar Mərkəzinin baş direktoru Jan-İv Şövalye “Yeni beynəlxalq tarazlıq kontekstində Azərbaycan üçün perspektivlər”, Azərbaycan səfirliyinin birinci katibi Məsim Məmmədov “Müasir təhlükələr və Avratlantik əməkdaşlığı” mövzularında məruzələr etmişlər.
Məruzələr və çıxışlarda Azərbaycanın Cənubi Qafqaz bölgəsində coğrafi siyasət baxımdan mühüm üstünlüyə, zəngin enerji resurslarına, xüsusilə neft hasilatına və ixracatına görə regionda yeganə ölkə kimi hegemon rola malik olması xüsusi vurğulanmış, Bakı-Tbilisi-Ceyhan neft kəmərinin əhəmiyyətindən, Avropa Birliyinin Cənubi Qafqazda rolunun getdikcə artmasından, bu quruma inteqrasiyadan, iqtisadi və digər sahələrin inkişafı baxımından Azərbaycanın Avropa ölkələrinə yaxınlaşmasından və başqa məsələlərdən söhbət açılmışdır.
Çıxış edənlər Ermənistan-Azərbaycan və Dağlıq Qarabağ münaqişələrinə toxunmuş, bu münaqişənin kökündə “Böyük Ermənistan” yaratmaq xülyasına qapılmış ermənilərin ərazi iddiasının durduğunu, dünya ölkələrinin və beynəlxalq qurumların Azərbacanın ərazi bütövlüyünü dəstəklədiklərini, XlX əsrin əvvəllərində İran və Türkiyədən köçürülmüş ermənilərin Dağlıq Qarabağda yerləşdirilməsi sayəsində həmin bölgədə demoqrafik baxımdan ermənilərin çoxluq təşkil etməsini, Xocalı soyqırımının XX əsrin faciəsi olmasını vurğulamış, Azərbaycan Prezidenti İlham Əliyevin Fransa Prezidenti Jak Şirakın dəvəti ilə bu ölkəyə səfəri zamanı münaqişə ilə bağlı verdiyi açıqlamaların əhəmiyyətini xüsusi qeyd etmişlər.
Fransanın Azərbaycandakı ilk səfiri Jan Perren ölkəmizin mövzuya dair nümayiş etdirilmiş xəritəsi ilə bağlı bəzi məqamlara toxunmuş, dünya azərbaycanlılarının sayına aydınlıq gətirmişdir.
Sonra movzu ətrafında debatlar keçirilmiş və çoxsaylı suallara ətraflı cavablar verilmişdir.
Axırda səfir Eleonora Hüseynova konfransa yekun vuraraq maraqlı və məzmunlu çıxışlara görə iştirakçılara təşəkkürünü bildirmişdir.
Konfransın işində Parisdə akkreditə olunmuş diplomatik korpusun əməkdaşları, Fransa ictimaiyyətinin nümayəndələri, tədqiqatçılar, Azərbaycan diasporunun üzvləri, jurnalistlər və bu ölkənin ali məktəblərində təhsil alan tələbələrimiz iştirak etmişlər.
Bölmənin digər xəbərləri
