PARİSDƏ QLOBAL XƏSTƏLİKLƏRİN QARŞISININ ALINMASI VƏ QLOBAL PROBLEMLƏRİN HƏLLİNİN MALİYYƏLƏŞDİRİLMƏSİ MƏSƏLƏLƏRİ MÜZAKİRƏ EDİLMİŞDİR
Yüzdən çox ölkənin nümayəndəsinin iştirak etdiyi tədbirdə Azərbaycanı iqtisadi inkişaf nazirinin müavini Mikayıl Cabbarov və Xarici İşlər Nazirliyinin əməkdaşı İsrafil Əhmədov təmsil etmişlər.
M.Cabbarovun sözlərinə görə, BMT 2015-ci ilə qədər “Minilliyin inkişaf məqsədləri” Proqramını hazırlamışdır. Proqramın əsas məqsədi dünyada yoxsulluğun azaldılması, ifrat yoxsulluğun ləğv olunması, vərəm, maliyariya və QİÇS kimi xəstəliklərin qarşısının alınmasıdır. Fransa, Çili və Braziliya bu proqram çərçivəsində problemlərin həllinin maliyyələşdirilməsi təşəbbüsü ilə çıxış etmişlər.
Konfransda qlobal xəstəliklərin qarşısının alınması və qlobal problemlərin həllinin maliyyələşdirilməsi üçün bir neçə üsul irəli sürülmüşdür. Onlardan biri təyyarə biletlərinə tarif qiymətlərinin əlavə edilməsidir. Aviaşirkətlərin hər bir biletinin dəyərinə müəyyən rüsum əlavə etməklə, əldə olunan vəsait hesabına xüsusi fondun yaradılması və toplanmış vəsaitin problemlərin həllinə yönəldilməsi qərara alınmışdır.
Fransa artıq 2006-cı il iyul ayının 1-dən etibarən təyyarə biletlərinə yeni tariflərin tətbiq ediləcəyini bəyan etmişdir. Həmin vaxt yerli reyslərin xidmətindən istifadə edəcək sərnişinlər adi salon üçün 1 avro, biznes salonu üçün 10 avro, Avropa hüdudlarından kənara uçduqda isə 40 avro ödəməli olacaqlar. Bir sıra ölkələr bu təşəbbüsə qoşulduqlarını bəyan vermişlər.
Konfransda problemlərin həllinin maliyyələşdirilməsi sahəsində işləyən miqrantların öz ölkələrinə göndərdikləri vəsaitlərin, beynəlxalq maliyyə əməliyyatlarının vergiyə cəlb edilməsi (valyuta mübadiləsi əməliyyatı nəzərdə tutulur), beynəlxalq silah ticarətindən xüsusi rüsum tutulması üsulları da sadalanmışdır.
Nazir müavini müzakirələrdə iştirak etmiş, bir çox məsələlərə Azərbaycan tərəfinin münasibətini bildirmişdir.
M.Cabbarov səfər çərçivəsində Fransanın Maliyyə, İqtisadiyyat və Sənaye nazirliyində keçirdiyi görüşlərdə Azərbaycan ilə Fransa arasında iqtisadi əməkdaşlıq, ticarətin sığortalanması və təşviqi mexanizminin tətbiqi və digər məsələlər ətrafında fikir mübadiləsi aparmışdır.
Avropa Əməkdaşlıq və İqtisadi İnkişaf Təşkilatındakı (OECD) görüşlərdə isə Azərbaycanda sərmayə mühitinin təkmilləşdirilməsi üçün birgə tədbirlərin həyata keçirilməsi və digər məsələlər müzakirə edilmişdir.
