Payız mövsümündə 1,5 milyon ağacın əkilməsi planlaşdırılır
Bakı, 12 oktyabr, AZƏRTAC
Meşə fondu torpaqlarında payız mövsümündə 1,5 milyon ağacın əkilməsi planlaşdırılır.
Bunu AZƏRTAC-a açıqlamasında Meşələrin İnkişafı Xidmətinin rəsmisi Vahid Fərzəliyev bildirib.
V.Fərzəliyev bildirib ki, noyabr ayından başlayaraq meşə fondu torpaqlarında payız əkin mövsümünə start veriləcək. O qeyd edib ki, bu ilin payız əkin mövsümündə ölkənin meşə fondu torpaqlarının açıq sahələrində, o cümlədən ötən illərdən yanğına məruz qalmış meşə torpaqlarında ümumilikdə 1,5 milyon ağac tinginin əkilməsi, 25 tondan artıq toxumun səpilməsi planlaşdırılır.
Xidmət rəsmisinin sözlərinə görə, hazırda əkin mövsümündə meşəbərpa tədbirlərinin həyata keçirilməsi məqsədilə Regional Meşə Təsərrüfatı Mərkəzlərinin xidməti ərazilərində hazırlıq işləri davam edir.
“Lənkəran, Lerik, Astara, Cəlilabad, Tovuz, Qazax, Ağstafa, Sabirabad, Şirvan, Şabran, Quba, Qusar, Xaçmaz, İsmayıllı, Şəki, Qax, Zaqatala, Balakən, Ağcabədi, Beyləqan, İmişli, Göygöl, Goranboy, Bərdə, Yevlax, Zərdab, Şəmkir, Daşkəsən və digər rayonların meşə fondu torpaqlarının açıq sahələrində bu günədək, ümumilikdə 436 hektar ərazidə torpaq hazırlığı işləri aparılıb”, - deyə V.Fərzəliyev qeyd edib.
Bölmənin digər xəbərləri
