PEKİN OLİMPİADASINA LİSENZİYA XARAKTERLİ TURNIRDƏ AZƏRBAYCAN DA TƏMSİL OLUNACAQDIR
Azərbaycanın qadın güləşçisi Zümrüd Qurbanhacıyeva (72 kq) mayın 31-də İsveçin Haparanda şəhərində start götürəcək və Pekin Yay Olimpiya Oyunlarına lisenziya xarakteri daşıyacaq II təsnifat turnirində çıxış edəcəkdir.
Azərbaycan Güləş Federasiyasından AZƏRTAC-a bildirmişlər ki, Z.Qurbanhacıyeva qadın güləşində hələ qazanılmayan yeganə vəsiqə uğrunda mübarizə aparacaqdır. İki gün davam edəcək yarışın proqramına əsasən, həmyerlimiz iyunun 1-də döşək üzərinə çıxacaqdır. Pekin Olimpiadasına lisenziya qazanmaq üçün Z.Qurbanhacıyeva öz çəkisində ilk üçlüyə düşməlidir.
Xatırladaq ki, hələlik yığmamız qadın güləşində Yay Olimpiya Oyunlarına 4 mümkün lisenziyadan 3-nə sahib çıxmışdır. Həmin vəsiqələri Mariya Stadnik (48 kq), Yuliya Radkeviç (55 kq) və Olesya Zamula (63 kq) qazanmışlar.
Bölmənin digər xəbərləri
