Peşə təmayüllü siniflərin məzunları əmək bazarına daha hazırlıqlı olurlar – REPORTAJ VİDEO
Quba, 4 yanvar, E.Yusifli, AZƏRTAC
Şimal bölgəsində ümumi orta təhsil bazasında təhsilalanların müxtəlif peşələr üzrə ilkin bilik və bacarıqlara yiyələnməsinə şərait yaradan peşə təmayüllü siniflərə 200-dən çox şagird cəlb olunub.
AZƏRTAC-ın bölgə müxbiri xəbər verir ki, Quba, Xaçmaz, Qusar və Şabran rayonlarında, ümumilikdə, doqquz məktəbdə 12 peşə təmayüllü sinif təşkil edilib.
Xaçmaz şəhər Cəfər Cabbarlı adına 6 nömrəli tam orta məktəbin peşə təmayüllü iki sinfində 4 ixtisas tədris olunur. Şagirdlər bu siniflərdə qənnadı köməkçisi, aşpaz köməkçisi, aqronom köməkçisi və dərzi köməkçisi ixtisasları üzrə ilkin bilik və bacarıqlara yiyələnirlər.
Qrup rəhbəri Vüsalə Qədirova bildirib ki, “Peşə təmayüllü siniflər” 2019-2020-ci tədris ilindən Elm və Təhsil Nazirliyinin dəstəyi ilə fəaliyyət göstərir. Bu siniflər şagirdlərin erkən yaşda maraqlarının müəyyənləşdirilməsi üçün olduqca önəmlidir. Təmayüllü siniflərdən məzun olan şagirdlər əmək bazarına daha hazırlıqlı olurlar.
“Peşə təmayüllü siniflərdəki şagirdlər həm nəzəri, həm də praktiki məşqələlərə cəlb olunurlar. İxtisaslar üzrə dərslərlə yanaşı şagirdlər təhlükəsizlik qaydalarını da mənimsəyirlər. Hər bir ixtisasa uyğun emalatxana mövcuddur. Bundan başqa, aqronom köməkçisi ixtisasını daha yaxşı mənimsəmək üçün şagirdlər təcrübə sahəsində əkin işləri görürlər. Şagirdlərə əsas səriştələr, STEAM və sahibkarlıq dərsləri də tədris olunur”, - deyə Vüsalə Qədirova söyləyib.
Ümumi təhsil müəssisələrinin peşə təmayüllü siniflərinin şagirdləri üçün təcrübə səfərləri təşkil olunur. Belə səfərlərin təşkil edilməsinin məqsədi şagirdləri potensial iş yerləri ilə tanış etmək və ixtisaslarla bağlı real iş mühitini göstərməkdir.
Qənnadı köməkçisi ixtisası üzrə təhsil alan XI sinif şagirdi Nərmin Ağakişiyeva gələcəkdə sahibkar kimi fəaliyyət göstərmək arzusundadır: “Ötən ildən peşə təmayüllü sinifdə təhsil alıram. Mənim əvvəldən də qənnadçı peşəsinə həvəsim olub. Burada şirniyyatların bişirilməsi qaydasını öyrənirəm. Tez-tez evdə də öyrəndiklərim əsasında müxtəlif şirniyyatlar hazırlayıram. Gələcəkdə özümə məxsus qənnadı məhsulları hazırlanan sexdə çalışmaq, sahibkar olmaq istəyirəm.”
Aqranom köməkçisi ixtisası üzrə təhsil alan Kənan Cahangirov kənddə yaşamasa da, peşə təmayüllü sinifdə öyrəndikləri sayəsində artıq bir çox kənd təsərrüfatı işlərini görə bilir. “Bizim burada təcrübə sahəmiz var. Torpağın yumşaldılması, bitkilərin becərilməsi, suvarılması, ziyanvericilərə qarşı mübarizə tədbirləri haqqında öyrənmişəm. Gələcəkdə bu peşə üzrə biliklərimi daha da artırıb, aqranom kimi fəaliyyət göstərmək istəyirəm”, - deyə o əlavə edib.
Peşə təmayüllü siniflərdə təhsil almaq üçün 9-cu sinfi bitirdikdən sonra ərizə ilə həmin siniflər mövcud olan məktəblərə müraciət etmək lazımdır. Peşə təmayüllü siniflərə keçid, həmçinin burada təhsil tamamilə ödənişsizdir. Şagirdlər hər ixtisas üzrə bir il təhsil alırlar.
Peşə təmayüllü siniflərdə şagirdlərə ümumi təhsil fənləri ilə bərabər, müvafiq peşə ixtisasına uyğun nəzəri və praktiki dərslər də keçirilir. Tədris ilinin sonunda şagirdlər təhsil aldıqları peşə ixtisasları üzrə imtahan verərək dövlət nümunəli sertifikat əldə edirlər.
Qeyd edək ki, ümumi orta təhsil bazasında təhsilalanların müxtəlif peşələr üzrə ilkin bilik və bacarıqlara yiyələnməsinə şərait yaradan peşə təmayüllü siniflərə ölkə üzrə 196 məktəbdə 4000-dən çox şagird cəlb olunub.
Bölmənin digər xəbərləri
