“PeşəFest”in növbəti ünvanı Ağdam olub
Bakı, 29 sentyabr, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyinin təşkil etdiyi “PeşəFest” bu dəfə Ağdam rayonunda keçirilib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, “Peşə öyrən, gələcəyini qur!” devizi ilə təşkil edilən festival gənclərin və şagirdlərin peşə seçiminə, onların karyera istiqamətində doğru addım atmalarına dəstək olmaq məqsədi daşıyır.
Tədbirdə Ağdam Rayon İcra Hakimiyyətinin başçısı Vaqif Həsənov, Dövlət Məşğulluq Agentliyinin İdarə Heyətinin sədri Sadiq Əliyev, Ağdam və ətraf rayonlardan dövlət və özəl qurumların rəhbər şəxsləri, ictimaiyyət nümayəndələri iştirak ediblər.
Festivalın açılış mərasimində çıxış edən V.Həsənov əmək bazarında aktual olan peşələrin gənclərə və yeniyetmələrə tanıdılmasında “PeşəFest”in xüsusi rolunu, belə tədbirlərin mütəmadi keçirilməsinin əhəmiyyətini qeyd edib.
Sadiq Əliyev “PeşəFest”in məqsədini diqqətə çatdıraraq, gənclərin maarifləndirilməsinin və düzgün peşə seçiminin həm onların gələcəklərini, həm də əmək bazarının balanslı inkişafını təmin etdiyini vurğulayıb.
Sonra peşəkarlar öz ixtisaslarına uyğun təqdimatlarla çıxış edib, təmsil etdikləri peşələrin xüsusiyyətlərini diqqətə çatdırıblar. Onlar festival iştirakçılarına peşə seçimi ilə bağlı öz tövsiyələrini bölüşüblər, yeniyetmələrin və onların valideynlərinin suallarını cavablandırıblar.
Festivalda nazirliyin tabeliyində DOST İnklüziv İnkişaf və Yaradıcılıq Mərkəzinin Qarabağ “DOST Evi” filialının benefisiarları da iştirak edərək musiqi nömrələri təqdim ediblər.
Qeyd edək ki, festival oktyabrın 1-də İmişlidəki Heydər Əliyev parkında, oktyabrın 3-də Ağsudakı Heydər Əliyev parkında, oktyabrın 8-də Ağdaşdakı Heydər Əliyev parkında, oktyabrın 11-də Qəbələdəki Heydər Əliyev parkında, oktyabrın 13-də Xaçmazdakı Zəfər parkında, oktyabrın 16-da Bakıdakı Dənizkənarı Milli Parkda keçiriləcək.
“PeşəFest”də 14 peşə (kibertəhlükəsizlik, data analitika, helpdesk, 3D animator, zinət əşyalarının dizayneri, turizm təşkilatçısı, dülgər, avtomobil təmiri üzrə çilingər, qida mühəndisi, qənnadıçı, xilasedici, barista, diş texniki və baytar) üzrə maarifləndirici tədbirlər təşkil olunur.
Festival iştirakçıları bu peşə sahələri üzrə inkişaf etməyin yolları, tələb olunan bacarıqlar, ixtisas seçimi barədə faydalı məlumatlar əldə etmək, mütəxəssislərlə ünsiyyət qurmaq imkanı qazanırlar.
Bölmənin digər xəbərləri
