Politoloq: Düşmənin onurğa sütununu əyən Aprel döyüşləri
Bakı, 3 aprel, AZƏRTAC
Tarixə “Aprel döyüşləri”, “Aprel müharibəsi” və ya “dördgünlük müharibə” kimi daxil olan 2016-cı il aprelin 1-dən 2-nə keçən gecədən başlayan və 4 gün davam edən hərbi qarşıdurma Qarabağda 1994-cü il mayın 12-də atəşkəs haqqında saziş imzalandıqdan bəri baş vermiş ən böyük hərbi qarşıdurma, ən şiddətli döyüşlər idi.
Aprel döyüşləri Azərbaycan tərəfinin qələbəsi ilə yekunlaşdı və nəticədə Tərtər rayonunun Talış kəndi ətrafındakı yüksəkliklər və Seysulan kəndi, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi, Tərtər rayonunun Qazaxlar kəndi və Tərtər rayonunun Suqovuşan kəndi istiqamətində yollar düşmən tapdağından azad olundu. Lələtəpə yüksəkliyinin azad edilməsi ilə Cəbrayıl rayonunun Cocuq Mərcanlı kəndi tamamilə yenidən quruldu. Beləliklə, Böyük Qayıdışın təməli qoyuldu. Aprel döyüşlərindən sonra da Ermənistan Azərbaycana qarşı hərbi təxribatlarını davam etdirdi. Məhz Tovuz və Naxçıvan istiqamətindəki döyüşlər bunun bariz nümunəsidir.
Bunu AZƏRTAC-a açıqlamasında politoloq Şəbnəm Həsənova bildirib.
Politoloq deyib: “2016-cı ilin Aprel döyüşləri göstərdi ki, illər ərzində müasir silahlarla, maddi texniki təminatla təchiz olunan Azərbaycan Silahlı Qüvvələri bütün göstəricilərə və parametrlərə görə erməni ordusunu qat-qat üstələyir. Bir çox xarici ekspertlər də qeyd etdiyi kimi, Aprel döyüşləri Azərbaycan Ordusunun modernləşdirilməsinin praktiki nəticə verməsinin ilk uğurlu nümunəsi oldu. 44 günlük müharibə ərzində Ermənistan ordusunda xidmətdən yayınma, fərarilik halları yaşanırdısa, Azərbaycanın qismən səfərbərlik elan etməsinə baxmayaraq, mərd oğullarımız bir nəfər kimi könüllü şəkildə orduya yollanmaq üçün gün sayırdılar. Müzəffər Ali Baş Komandan İlham Əliyev də dəfələrlə qeyd etdiyi kimi, biz bu Qələbəni əhəmiyyətsiz danışıqlarla yox, qəhrəman əsgər və zabitlərimizin canı-qanı bahasına əldə etmişik. O əsgər, zabitlər ki, öz ölümləri ilə Aprel döyüşlərində bizim böyük Zəfərimizə işıq tutmuş oldular”.
2016-cı il Aprel döyüşlərinin torpaqlarımızın işğaldan azad olunması prosesinin başlanğıcı, şanlı hərb salnaməmizə düşən Zəfər olduğunu qeyd edən Ş.Həsənova vurğulayıb ki, 2020-ci ildə qazandığımız Qələbənin təməli məhz beş il əvvəl qoyuldu. Aprel döyüşlərinin təcrübəsi, əldə olunan məlumatlar, düşmənin möhkəmləndirilmiş müdafiə sədlərini keçmək bacarığı bizi qazandığımız uğura apardı. Məhz Aprel döyüşləri düşmənə, onun havadarlarına Azərbaycan Ordusunun gücünü, qələbə əzmini sübut etdisə, bütün dünyaya da Azərbaycanın tarixi ədaləti bərpa etməklə öz dədə-baba, əzəli torpaqlarından əl çəkməyəcəyini göstərdi. Aprel qələbəsi və yekun Zəfərimiz Azərbaycan Silahlı Qüvvələrinin müasir dövrün ən yaxşı ordularından biri olduğunu və modern müharibə qanunlarına uyğun olaraq səmərəli fəaliyyətini nümayiş etdirdi.
“Hazırda Müzəffər Ali Baş Komandan İlham Əliyevin iradəsi və prinsipiallığı ilə şanlı Ordumuzun qazandığı Zəfəri, Azərbaycanın regionda yaratmış olduğu yeni geosiyasi reallığı həzm edə bilməyən, Türkiyə-Azərbaycanın möhkəm və sarsılmaz birliyindən qıcıqlanan dairələr hələ də mənfur əməllərlə məşğuldurlar. Belə ki, bəzi mənbələrin şanlı Ordumuz haqqında mənfi yüklü məlumatlar yaymalarına, tarixi qələbəmizə kölgə salmaq cəhdi göstərməklərinə baxmayaraq, bu gün bütün xalqımız hər ötən gün öz rəhbərinin ətrafında daha da sıx birləşir, xain qüvvələri birmənalı şəkildə rədd edir. Çünki xalqımız əmindir ki, illərlə Vətən həsrəti ilə çat vermiş dodağımıza su verən, Vətən qürubu ilə yanan ürəyimizi Vətənə qovuşmaqla sərinlədən, bu xalqı məhv olmağın astanasından qurtarıb əsil xilaskarlıq missiyası həyata keçirən ümummilli lider Heydər Əliyev siyasətinin layiqli davamçısı olan, bütün təzyiqlərə, təhdidlərə mərd və mərdanə şəkildə sinə gələrək Azərbaycanın milli maraqlarını əzmlə, prinsipiallıqla müdafiə edən, ərazi bütövlüyümüzü təmin edən Prezident İlham Əliyevdir”, - deyə politoloq qeyd edib.
Bölmənin digər xəbərləri
