Politoloq: “NO WAR”çıların məqsədi Azərbaycana qarşı sanksiyalar tətbiq edilməsinə nail olmaqdır
Bakı, 11 oktyabr, AZƏRTAC
Azərbaycan həmişə məruz qaldığı təcavüzün öz ayağına yazılması təbliğatı ilə üz-üzədir. Ən yeni tarixdə bu təbliğatı fəal şəkildə həyata keçirməyə çalışan dairələr ölkə daxilində sərbəst fəaliyyət göstərməkdədir. Onlar hərbi eskalasiyaların, baş vermiş döyüşlərin, insan itkisinin günahını Azərbaycanın adına yazmaq üçün çalışırlar. Sərhəddə və Qarabağdakı keçmiş separatçı hərbi qrupların törətdikləri təxribatlara verilən cavabları həmişə təcavüz kimi təqdim etməklə rəsmi Ermənistanın təbliğat tezislərini daxildə tirajlayırlar. Bunu məğlub olan Ermənistanın qisasını diplomatik müstəvidə almaq səyləri üçün təbliğat da adlandıra bilərik.
Bu fikirləri AZƏRTAC-a açıqlamasında Gənc Demokratlar İnstitutu İctimai Birliyinin sədri, politoloq Yeganə Hacıyeva söyləyib.
“Aparılan bu təbliğatın əsas hədəfləri Azərbaycana qarşı sanksiyaların tətbiq edilməsinə nail olmaqdır. Bu məqsədlə də regional siyasi, media və təhlükəsizlik mərkəzlərində genişmiqyaslı fəaliyyət qurulub. Məqsədə çatmaq üçün isə ən müxtəlif vasitələrdən istifadə edilir”, - deyən politoloq vurğulayıb ki, BMT, Avropa İttifaqı (Aİ), Avropa Şurası, Avropa Parlamenti ayrı-ayrı dövlət başçılarına müraciətlər edərək, Ermənistanın Azərbaycan tərəfindən guya təcavüzə məruz qaldığı barədə yalan iddialar irəli sürür. Ötən 30 il müddətində olduğu kimi, bu dəfə də bütöv bir “yalan paketi” hazırlayıb dayanmadan bütün ünvanlara göndərirlər. Azərbaycan dövləti, diplomatiyası da onlara tutarlı cavab verir və iflasa uğradılan “yalançı erməni kampaniyası”nı zərərsizləşdirmək üçün hər dəfə yeni addımlar atır.
Bütün dünyada “pasifizm” sülhsevər fəlsəfə daşıyıcısı olduğu halda, Azərbaycanda “pasifistlər” ermənilərə “pas ötürmə maşını” kimi fəaliyyət göstərirlər. Bunun üçün bütöv bir nəsil yetişdirilib və zaman-zaman istifadə edilib. Erməni diversantlar sərhədlərimizə soxulduğu kimi, erməni şəbəkəsi də sosial media platformaları və internet resursları vasitəsilə informasiya diversantlarını media məkanımıza istiqamətləndirib.
Bizim “pasifistlər” “sülh naminə” Ermənistana dəstək verdikləri zamanlarda isə ermənilər həmişə əksinə davranıblar. Eyni zamanda, erməni ziyalılar, din, mədəniyyət, ədəbiyyat, elm və incəsənət xadimləri, qeyri-hökumət təşkilatları, KİV-ləri, diaspor qurumları tərəddüdsüz olaraq öz dövlətlərini dəstəkləyirlər. Onlar bunu təkcə indi Ermənistanın əzilib zəif düşdüyü dövrdə deyil, həm də Azərbaycan torpaqlarını işğal altında saxladığı zamanlarda ediblər.
“Pasifistlər” - yəni, müharibə əleyhinə çıxanlar hər zaman və dünyanın hər yerində olublar deyən Y.Hacıyeva əlavə edib: “Pasifistlərin sıralarında dünyaşöhrətli yazıçıları, alimləri, ziyalıları görmək mümkündür. Pasifist olmağı kimsə qadağan etmir. Çünki zahiri də olsa, şüarları insanpərvərlik, sülhsevərlikdir. Onlar qan, göz yaşı, ölüm-itim istəmirlər. Hər nə vasitə ilə olursa-olsun, sülh bağlanılmasına tərəfdar çıxırlar. Amma “azərbaycanlı pasifistlər” bu prinsipi pozurlar. Onların çıxışları sülh qurmağa yox, Ermənistanın qalib və haqlı tərəf kimi tanınmasına köklənib. Xüsusiyyətləri budur ki, milli maraqlar düşünülmür, düşmənə açıq dəstək verilir.
Nümunə üçün deyək ki, azərbaycanlı “sülhsevərlər” torpaqlarımızın işğal altında qalması, 30 il ərzində talan edilməsi barədə özlərinin sosial şəbəkə hesablarında bircə kəlmə də yazmayıb, Ermənistanın “xətrinə dəyəcək” bircə cümlə işlətməyiblər.
Bu qruplar həm də Qərb dairələrindən maliyyələşir. Bunun da izahı odur ki, onların müxalif fikirlilik görüntüsü ilə maliyyələşdirilməsi, təlimatlandırılması, QHT sektorunun, medianın siyasi oyunlara cəlb edilməsi ilə ölkədə vətəndaş itaətsizliyi mühitinin yaradılması istiqamətində ardıcıl iş aparılır. Bunun üçün də Vətən müharibəsindəki Zəfəri dəyərsizləşdirməyə çalışan “NO WAR”çılardan istifadə edilməyə çalışılır”.
Bölmənin digər xəbərləri
