Portuqaliyalı futbolçu: Məqsədim “Kəpəz”in Premyer Liqada qalmasına kömək etməkdir - MÜSAHİBƏ
Bakı, 11 fevral, AZƏRTAC
Misli Premyer Liqasında 18 xalla doqquzuncu pillədə qərarlaşan “Kəpəz”in portuqaliyalı futbolçusu Dioqo Verdaşka AZƏRTAC-ın suallarını cavablandırıb. Müsahibəni təqdim edirik.
- Misli Premyer Liqasında "Araz-Naxçıvan"la səfərdə keçirdiyiniz XXII tur oyununda qapılara qol vurulmadı. Naxçıvan təmsilçisi turnir cədvəlində 44 xalla lider “Qarabağ”ın ən yaxın izləyicisidir. Belə güclü rəqiblə görüşdə xal qazanmaq növbəti görüşlər üçün motivasiyanızı artırırmı?
- Bəli, xal qazanmaq həmişə çox vacibdir, amma bu liqada səfərdən xalla qayıtmaq daha önəmlidir. Hər kəs meydana üç xal üçün çıxdığımızı bilirdi. Lakin hesab edirəm ki, qol buraxmamağımız və rəqibə 3 xal qazandırmamağımız da müsbət haldır.
- Necə düşünürsünüz, qələbə qazanmağınıza nə mane oldu?
- Fikrimcə, hər iki komandanın da çox yaxşı oynadığı qarşılaşma oldu. Bizim də, rəqibin də qalib gəlmək şansı var idi. Belə olan halda düşünürəm ki, heç-heçə ən ədalətli nəticədir.
- Komandanız Premyer Liqada qalmaq üçün mübarizə aparır. Şansları necə qiymətləndirirsiniz?
- Axırıncı oyunlarda nəyə qadir olduğumuzu sübut etdik. Artıq daha yaxşı oynayırıq. Çempionatın son 5 qarşılaşmasında 8 xal qazanmışıq. Bunun yaxşı nəticə olduğunu düşünürəm. Bütün bunları nəzərə alaraq deyə bilərəm ki, Premyer Liqada qalmaq üçün şanslarımız var.
- Azərbaycan Kubokunda mübarizəni davam etdirirsiniz. Fevralın 28-də keçiriləcək 1\4 finalın cavab oyununda “Neftçi”ni məğlub edəcəyinə inanırsınız?
- Bəli, biz hər oyuna qələbə üçün çıxırıq. Kubok matçları bizim üçün xüsusi əhəmiyyət kəsb edir. Çünki bu oyunlarda hər an hər şey ola bilər. Sona qədər mübarizə aparacaq, qələbə üçün əlimizdən gələni edəcəyik.
- Kuboku qazansanız, avrokuboklara vəsiqə əldə edəcəksiniz. Amma “Kəpəz” üçün Premyer Liqada qalmaq da önəmlidir. İndiki halda əsas məqsədiniz nədir?
- Məqsədimiz oyundan-oyuna daha da irəliyə getməkdir. İndi ən önəmlisi, çempionatda “Şamaxı” ilə keçirəcəyimiz matçdır. Bu həftə oyuna hər zaman olduğu kimi 3 xal qazanmaq məqsədi ilə hazırlaşacağıq.
- “Kəpəz”lə müqaviləniz bu mövsümün sonunda başa çatacaq. Sizə yeni sözləşmə təklif edilib?
- Agentlərim bu barədə mənə hər hansı məlumat verməyiblər. Hələ müqaviləmin bitməsinə zaman var. Məqsədim “Kəpəz”in Premyer Liqada qalmasına kömək etməkdir.
- Əvvəllər Portuqaliyanın U-20 millisində çıxış etmisiniz. O illəri necə xatırlayırsınız?
- Bəli, Portuqaliyanın U-16, U-17, U-18, U-19 və U-20 yığmalarının heyətində çıxış etmişəm. O illəri çox yaxşı xatırlayıram. Milli komandanın uğurları üçün oynamaq çox gözəl hissdir.
- Həmin heyətdən kimlərlə dostluq münasibətiniz var?
- İngiltərənin “Mançester Siti” klubunda oynayan Ruben Diaş və Yunanıstan təmsilçisi “Olimpiakos”da çıxış edən Andre Orta ilə yaxın dostuq. Mənim onlarla yaxşı ünsiyyətim var.
- Bəs Portuqaliya seçməsinin əsas komandasına yüksələ bilməməyinizə nə səbəb oldu?
- Səbəbini bilmirəm. Bunu millinin baş məşqçisindən soruşmaq lazımdır.
Bölmənin digər xəbərləri
