Praqa küçələrində də traktor və kombaynlar şütüyür
Praqa, 20 fevral, AZƏRTAC
Çərşənbə axşamı səhər tezdən narazı fermerlərin Praqaya getdikləri ilk traktor və kombaynların nəhəng təkərləri Çexiya paytaxtının səkiləri boyunca şütüyürdü. Bənzər etirazlar əvvəllər Avropanın digər şəhərlərində də müşahidə olunub.
Az sonra Çexiya Kənd Təsərrüfatı Nazirliyinin binasının yanından keçən magistralda kənd təsərrüfatı texnikasının bütöv bir sırası düzülüb. Belə ki, “sahə işçiləri” hökumətin bürokratik prosedurlarının çoxluğuna, vergilərin artırılmasına və Avropa Birliyinin “Yaşıl saziş” (Green Deal”) adlı ətraf mühit proqramına etiraz ediblər.
AZƏRTAC xəbər verir ki, fermerlər “İnəyin nə olduğunu bilirsiniz?”, “İstefa!”, “Xalq üçün bir iş gör!” plakatları ilə binanın içərisinə daxil olublar. Təxmini hesablamalara görə, artıq səhər saatlarında Kənd Təsərrüfatı Nazirliyinin qərargahının qarşısına minə yaxın traktor və kombayn yığılıb, indi də onların ardı-arası kəsilmir.
Fermerlər, ilk növbədə, işçiləri əhəmiyyətli dərəcədə əlverişsiz vəziyyətə salan “Yaşıl saziş”dən narazıdırlar. İkincisi, hazırda Avropa İttifaqı ilə Cənubi Amerika dövlətləri arasında rüsumsuz ticarət haqqında işlənib hazırlanan sazişdir. Müqavilə imzalananda oradan Avropaya mal axını artacaq və rəqabət güclənəcək.
Fermerlərin iri sənaye təşkilatları - Aqrar Palata, Kənd Təsərrüfatı Birliyi və Fərdi Fermerlər Assosiasiyası bugünkü nümayişi dəstəkləməyib.
Kənd təsərrüfatı naziri bir gün əvvəl bəyan etmişdi ki, o, “bilavasitə tarlada çalışan, quşçuluq və mal-qara yetişdirən fermerlərin problemlərini yaxşı anlayır və onların bir çox tələblərini bölüşür”. Eyni zamanda, bu nazirliyin aksiyanın təhrikçiləri, yəni təşkilatçıların şəxsiyyətləri ilə bağlı sualları var.
“Gəlin təşkilatçılara daha yaxından nəzər salaq! Bunlar ümumiyyətlə fermer deyillər. Onlar vaxtilə COVID peyvəndlərinə qarşı nümayişlər təşkil edənlərin təmsilçiləridir", -deyə kənd təsərrüfatı naziri Marek Vıbornı səhər saatlarında həm etirazçılar, həm də rəsmilərlə müsahibə aparan Çexiya televiziyasına bildirib.
Nazir vurğulayıb: “Mən fermerlərin Baş nazirə və kənd təsərrüfatı naziri kimi mənə ünvanladığı məktubu aldım. Onu mənə Aqrar Palatanın keçmiş rəhbəri Yan Veleba verib. Bu məktuba da, başqa müraciətlərə də cavab verəcəyəm. Ümid edirəm ki, məktubda konkret ünvan tapacağıq, baxmayaraq ki, o, sadəcə olaraq anonim imzalanıb: Fermerlər”.
Fermerlər başa düşürlər ki, “Yaşıl saziş” ləğv edilə bilməz, lakin onlara kömək lazımdır. Məsələn, çexlərin bir çoxu şəhər kənarında yaşayan 80 yaşlı nənənin yalnız daxili yanma mühərriki olan avtomobilindən istifadə edə bilmədiyi üçün mərkəzdə mağazaya piyada gedəcəyini təsəvvür etməkdə çətinlik çəkirlər.
"Onu da qeyd etmək lazımdır ki, ilkin olaraq “Yaşıl saziş” həddindən artıq iddialı şəkildə hazırlanmışdı və bu plan təkcə Çexiyanı deyil, bütün Avropanı rəqabətsiz hala gətirməyə qadirdir", - deyə nazir Marek Vıbornı etirazçıların tələbləri ilə qismən razılaşıb.
Bu arada, Çexiyada etirazlar daha da artır.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
