PRAQADA BEYNƏLXALQ OLİMPİYA KOMİTƏSİNİN 115-Cİ SESSİYASI AÇILMIŞDIR
Beynəlxalq Olimpiya Komitəsinin (BOK) prezidenti, belçikalı Jak Roqqe iyulun 2-də axşam BOK-un 115-ci sessiyasını açmışdır. Təntənəli açılış mərasimi Praqadakı “Obednı dum” (“Paytaxt evi”) teatrında olmuşdur. Roqqe qeyd etmişdir ki, BOK-un sessiyası Praqada üçüncü dəfərdir keçirilir. 1925-ci ildə keçirilmiş birinci sessiya tarixə düşmüşdür, çünki o zaman olimpiya hərəkatının banisi Pyer de Kuberten bu hərəkatdan çıxmışdır. İkinci dəfə Praqa qonaqları 1977-ci ildə qəbul etmişdir. AZƏRTAC-ın İTAR-TASS-dan aldığı məlumata görə, BOK prezidenti təntənəli nitqində Olimpiya oyunlarını keçirmək hüququ uğrunda mübarizəyə qoşulmaq istəyən şəhərlərin sayının get-gedə artdığını məmnunluqla vurğulamışdır. 2010-cu ildə Qış Olimpiadasının sahibi olmaq uğrunda səkkiz şəhər mübarizə aparmışdısa, 2012-ci ildə Yay Olimpiadası uğrunda mübarizəyə doqquz şəhər – Havana (Kuba), İstanbul (Türkiyə), Leypsiq (Almaniya), London (Böyük Britaniya), Madrid (İspaniya), Moskva (Rusiya), Nyu-York (ABŞ), Paris (Fransa) və San-Paulu, yaxud Rio-de Janeyro (Braziliyadan namizəd iyulda müəyyən olunacaq) qoşulacaqdır.
Bölmənin digər xəbərləri
