ELM VƏ TƏHSİL
Prezident Forumda Azərbaycanın mövqeyinin dəyişməz olduğunu növbəti dəfə vurğulayıb
Bakı, 9 mart, AZƏRTAC
Bakı qısa müddətdə neçə mötəbər beynəlxalq tədbirə ev sahibliyi edib. Keçən həftə paytaxtımızda Qoşulmama Hərəkatının “COVID-19”a qarşı mübarizə üzrə Təmas Qrupunun Zirvə görüşü keçirilib. Bu gün isə Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “Dünya bu gün: Çağırışlar və ümidlər” mövzusunda X Qlobal Bakı Forumu işə başlayıb. Forumun açılışında Prezident İlham Əliyevin konseptual xarakterli çıxışı böyük maraqla qarşılanıb. Dövlətimizin başçısı bu çıxışında yeni dünya düzəni, dünyanın müasir təhlükəsizlik arxitekturası, enerji təhlükəsizliyi ilə bağlı fikirlərini paylaşıb.
Bu fikirləri AZƏRTAC-a müsahibəsində Azərbaycan Respublikasının Prezidenti yanında Dövlət İdarəçilik Akademiyasının şöbə müdiri professor Ziyafət Həbibova söyləyib.
Z.Həbibova bildirib ki, Qlobal Bakı Forumunun intellektual səviyyəsinin digər beynəlxalq konfransların səviyyəsinə uyğunluğuna diqqət çəkən Azərbaycan Prezidenti önəmli mesajlar verib. Əslində, Prezident İlham Əliyevin verdiyi mesajlar bir daha dövlətimizin başçısının cəsarətindən və qətiyyətindən xəbər verir. Prezident bölgədə sülh, sabitlik və inkişaf tərəfdarı olan Azərbaycanın mövqeyinin dəyişməz olduğunu növbəti dəfə vurğulayıb. Dövlətimizin başçısının çıxışına istinadla qeyd olunub ki, Avropada vəziyyət kəskin şəkildə dəyişib və Azərbaycanın karbohidrogen ehtiyatlarına tələbat artır. Prezidentin çıxışında Azərbaycanın “yaşıl enerji” zonasına və bərpaolunan enerji sahəsində beynəlxalq enerji bazarında ciddi oyunçuya çevriləcəyi də qeyd edilib.
“Ümumiyyətlə, hər zaman olduğu kimi, Prezident İlham Əliyev öz çıxışında həm ölkəmiz, xalqımız üçün mühüm məsələlərlə bağlı mövqeyini bildirib, eyni zamanda, qlobal müstəvidə maraq dairəsində olan məsələlər ətrafında özünün strateji baxışlarını ortaya qoyub, olduqca yerində və əhəmiyyətli çağırışlar edib”-, deyə Z.Həbibova fikrini yekunlaşdırıb.