Prezident İlham Əliyevin çıxışı “media və dil” mövzusunu yenidən aktuallaşdırıb - Ekspert
Bakı, 7 noyabr, AZƏRTAC
Qloballaşma prosesi dünya dilləri arasında qarşılıqlı əlaqəni gücləndirsə də, milli dillərinin assimilyasiyaya məruz qalması riskini də artırır. Rəqəmsal texnologiyaların inkişafı, sosial media platformalarının çoxalması bu neqativ prosesi daha da stimullaşdırır. Elm, texnologiya, biznes və media sahələrində yad sözlərdən ifrat dərəcədə istifadə meyli güclənir. Bu tendensiya milli dillərin saflığını pozur, tətbiqi imkanlarını çətinləşdirir. Xüsusilə gənclər arasında ana dili əvəzinə “qarışıq dil”dən istifadə edilməsi adi hala çevrilir. Prezident İlham Əliyevin noyabrın 3-də Milli Elmlər Akademiyasının 80 illik yubileyi mərasimində söylədiyi nitq ana dilinin qorunması yönündə atılması zəruri olan addımlar barədə istiqamət verir.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
O bildirib ki, Prezident İlham Əliyev Azərbaycan dilinin qorunması və inkişaf etdirilməsi məsələsini daimi olaraq diqqətdə saxlayır. 2013-cü il aprelin 9-da “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramının təsdiqi haqqında” Sərəncam, 2018-ci ildə isə “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı” Fərman verilib. Həmin il “Azərbaycan dilinin elektron məkanda daha geniş istifadəsinin təmin edilməsi haqqında” Sərəncam imzalanıb.
Bu fərman və sərəncamlar onu göstərir ki, Prezident İlham Əliyev Azərbaycan dilinə təkcə ünsiyyət vasitəsi və dövlət dili kimi deyil, həm də milli kimliyimizin, dövlətçiliyimizin və mənəvi irsimizin daşıyıcısı kimi yanaşır.
"Təsadüfi deyil ki, Ulu Öndər Heydər Əliyev də “dil bir millətin varlığını, onun mədəniyyətini yaşadan əsas amildir” deyərək, onun qorunub inkişaf etdirilməsini daima diqqət mərkəzində saxlayırdı.
Prezident İlham Əliyevin noyabrın 3-dəki nitqi ana dilinin tətbiqi ilə bağlı müzakirələri yenidən aktuallaşdırıb. Son üç gün ərzində Qeyri-Hökumət Təşkilatlarına Dövlət Dəstəyi Agentliyinin, Medianın İnkişafı Agentliyinin, Mətbuat Şurasının, Milli Elmlər Akademiyasının təşkilatçılığı ilə çoxsaylı tədbirlər keçirilib. Bu tədbirlərdə rəsmi strukturlarla yanaşı, ictimai institutların, o cümlədən Qeyri-Hökumət Təşkilatlarının və media subyektlərinin Azərbaycan dilinin qorunması yönündə missiyaları müzakirə edilib. Bu kontekstdə medianın rolu üzərində daha çox dayanılıb. Media subyektlərinin dilin qorunması yönündə daha çox imkanlara malik olduğu qeyd edilib. Narahatlıq doğuran hal odur ki, Azərbaycan dilinin media müstəvisində tətbiqi və qorunması sahəsində bir sıra sistemli problemlər mövcuddur. Bu problemlər daha çox müasir texnologiya mühitinin təsirləri ilə bağlıdır. Müzakirələr fonunda həmin problemlərin aradan qaldırılması üçün innovativ təkliflər səsləndirilir", - deyə M. Ələsgərli vurğulayıb.
Bölmənin digər xəbərləri
