Bakı, 5 noyabr, AZƏRTAC

Prezident İlham Əliyevin noyabrın 1-də Əlcəzair səfəri təkcə ölkəmizdə deyil, bütün ərəb regionunda və bəzi Avropa dairələrində maraqla qarşılandı. Məlumdur ki, bu səfər Əlcəzair Prezidenti Abdelmacid Tebbunun xüsusi dəvəti əsasında gerçəkləşmişdi. Prezident İlham Əliyev Ərəb Dövlətləri Liqasının (ƏDL) Əlcəzair paytaxtında keçirilən 31-ci Zirvə toplantısında iştirak və çıxış edib, həmçinin Əlcəzair dövlət rəsmiləri ilə görüşlər keçirib.

Bunu AZƏRTAC-a açıqlamasında Milli Məclisin deputatı İltizam Yusifov söyləyib.

O bildirib ki, ƏDL-in 31-ci sammitində iştirak edən yeganə qeyri-ərəb dövlət başçısı Azərbaycan Prezidenti İlham Əliyev olub. Prezident bu tədbirə həm də Qoşulmama Hərəkatının Sədri kimi qatılıb. Məlumdur ki, ərəb ölkələri, o cümlədən Əlcəzair Qoşulmama Hərəkatının genişlənməsində və güclənməsində maraqlıdırlar. Misir, Suriya və Livandakı erməni diasporunun aktiv antiazərbaycan fəaliyyətinə baxmayaraq, 2020-ci ildə 44 günlük Vətən müharibəsində Qoşulmama Hərəkatı, ərəb dövlətləri Azərbaycana müəyyən dəstək nümayiş etdiriblər. Azərbaycan-Türkiyə, Azərbaycan-İsrail dostluq münasibətləri fonunda ərəb dövlətlərinin dəstəyini qazanmaq Azərbaycana heç də asan başa gəlməyib. Bu, ölkə rəhbərliyinin düşünülmüş, ardıcıl və prinsipial xarici siyasəti nəticəsində mümkün olub.

“Bu arada qeyd edim ki, siyasi, hərbi və sosial böhranın hökm sürdüyü, daxili münaqişələr üzündən zəifləyən ərəb dövlətləri bu böhrandan çıxmaq üçün yollar arayır. Əlcəzairdə keçirilən toplantı da bu məqsədə xidmət edirdi. Son illər bütün dünyada məşhurlaşan qeyri-ərəb dövlətinin liderinin - Prezident İlham Əliyevin ƏDL-in toplantısına qatılması bu qurumun nüfuzuna yalnız müsbət təsir göstərdi. Bütün bunlar həm də onu göstərdi ki, Azərbaycanın ərəb ölkələri ilə əlaqələri daha da inkişaf edir.

Xatırladım ki, Azərbaycan 2006-cı ildən ƏDL-nin üzvüdür. Haşiyəyə çıxaraq, vurğulayım ki, ƏDL 1945-ci ildə təsis edilib və 22 dövləti özündə birləşdirir. Liqa dövlətləri arasında nə qədər ixtilaflar olsa da, müəyyən məsələlərdə, o cümlədən Fələstin-İsrail münasibətlərinə münasibətdə vahid mövqedən çıxış edə biliblər. Digər maraqlı məqam Azərbaycanla Əlcəzair arasında diplomatik əlaqələrin 30 illik tarixi münasibətilə bu ərəb ölkəsinin rəhbərliyinin dövlətimizin başçısına xüsusi diqqət göstərərək onu ali tədbirə dəvət etməsi oldu. Bu faktın özü xüsusi önəm kəsb edir və bir sıra mətləblərdən xəbər verir”, - deyə deputat qeyd edib.

O diqqətə çatdırıb ki, “ərəb baharı” Əlcəzairdən də yan keçməyib. 2018-ci ildə inqilab nəticəsində hakimiyyət dəyişikliyi baş verdi. Yeni hökumət “sözəbaxan”, “Qərbdən asılı” damğalarını üzərindən atdı və milli-tarixi məsələlərə daha çox diqqət ayırmağa çalışdı. Dünyanın ən böyük neft və qaz istehsalçılarından olan Əlcəzair Avropanın, o cümlədən Fransanın qazla təminatında xüsusi paya malikdir. Fransanın adını təsadüfən çəkmədik. Əlcəzair adı çəkiləndə çoxunun təsəvvüründə Fransanın bu ölkədəki soyqırımı siyasəti canlanır. Əlcəzair yüz ildən çox Fransanın müstəmləkəsi olub və müstəmləkə dövründə 1,5 milyon əlcəzairli fransız müstəmləkəçiləri tərəfindən qətlə yetirilib.

Fransa və onun Prezidenti Makronun ciddi-cəhdlə soyqırımı faktını ört-basdır etməyə çalışdığını söyləyən İltizam Yusifov deyib: “Rəsmi Paris hesab edir ki, müəyyən jestlər etməklə, Əlcəzairdə törətdikləri qətliamları unutdura, çatlaqları ört-basdır edə biləcəklər. Digər tərəfdən Fransa öz əməllərini qulaqardı edib Türkiyə və Azərbaycanı ermənilərə qarşı soyqırımı və digər cinayətlər törətməkdə ittiham edir. Bu baxımdan Prezident İlham Əliyevin Əlcəzairə səfəri, Milli Mücahidlər Muzeyinə baş çəkməsi və keçirilən sammitin açılışında etdiyi çıxış xüsusi önəm daşıyır. Azərbaycan Prezidenti deyib ki, Fransanın Əlcəzair xalqına qarşı törətdiyi qətliam dünyanın heç vaxt unutmamalı olduğu bir hadisədir.

“Fransa yüz ildən çox bir müddət ərzində Əlcəzair xalqına qarşı çox dəhşətli müharibə aparmışdır. Bu müharibə 1,5 milyon əlcəzairlinin ölümü ilə nəticələnmişdir”, - deyən Prezident İlham Əliyev Milli Mücahidlər Muzeyinin xatirə kitabına oxşar tarixi əhəmiyyətli ürək sözlərini köçürüb. Mətndə qeyd olunur: “Bu muzey Əlcəzair xalqına qarşı misli görünməmiş qəddarlıqla və şiddətlə həyata keçirilən müstəmləkə siyasətinin, müharibə və insanlıq əleyhinə cinayətlərin, müstəmləkəçi qüvvələrə qarşı ümumxalq mübarizəsinin və bir milyon yarım şəhidin canı bahasına qazanılmış müstəqillik qələbəsinin yaddaşlarda qorunub saxlanması və gələcək nəsillərə ötürülməsi baxımından müstəsna əhəmiyyət kəsb edir”.

“Təsadüfi deyil ki, Azərbaycan Prezidentinin bu qeydləri dünya mediasında dərc edildi. Bu mesaj Fransa Prezidentinin Azərbaycanla bağlı yürütdüyü ədalətsiz siyasətinə tutarlı cavab idi.

Bütün hallarda Azərbaycanın siyasi rəhbərliyinin ərəb dövlətləri ilə münasibətdə ardıcıllığı, səmimiliyi xüsusi vurğulanmalıdır. Zəngin karbohidrogen ehtiyatlarına malik olan ərəb dövlətləri və Azərbaycan beynəlxalq iqtisadi platformalarda sıx əməkdaşlıq edirlər. Artıq ərəb ölkələrindən işğaldan azad olunmuş Qarabağda təmir-quruculuq işlərində iştirakla bağlı mesajlar alınmaqdadır. Yaxın gələcəkdə ərəb dövlətləri ilə Azərbaycanın münasibətlərində siyasi məzmun və keyfiyyət baxımından yeni mərhələnin başlayacağını söyləmək mümkündür”, - deyən deputat fikirlərini yekunlaşdırıb.