Qahirədə “Müasir Azərbaycan diplomatiyasının 100 illiyi” kitabının təqdimatı olub
Bakı, 17 dekabr, AZƏRTAC
Misir Xarici İşlər Nazirliyinin Misir Şurasında Azərbaycanın bu ölkədəki səfirliyinin əməkdaşı Emil Rəhimovun “Müasir Azərbaycan diplomatiyasının 100 illiyi” kitabının təqdimatı keçirilib.
Ölkəmizin Misirdəki səfirliyindən AZƏRTAC-a bildiriblər ki, təqdimat mərasimində səfirlər, ictimai-siyasi xadimlər, iqtisadçılar, media nümayəndələri, misirli və azərbaycanlı tələbələr iştirak ediblər.
Misir Şurasının sədri, səfir İzzət Səd tədbiri açaraq müasir Azərbaycan diplomatiyasının tarixinin zəngin olduğunu, çox çətin sınaqlardan keçdiyini, müstəqillik dövründə çoxlu nailiyyətlər əldə etdiyini vurğulayıb.
Müasir Azərbaycan diplomatiyasının tarixinə həsr olunan kitabın əhəmiyyətindən danışan səfir nəşrin ərəb dilində olmasının Azərbaycan həqiqətlərinin ərəb-müsəlman ictimaiyyətinə çatdırılması nöqteyi-nəzərdən böyük önəm daşıdığını diqqətə çatdırıb.
Sonra çıxış edən Emil Rəhimov kitab barədə məlumat verib, Azərbaycan diplomatiyasının tarixinin çox qədim olduğunu, hətta eramızdan əvvəl III-II minilliklərə gedib çıxdığını bildirib. Müəllif 1918-ci ildə müsəlman Şərqində ilk demokratik respublikanın təsis edildiyini bildirib, iki il ərzində Azərbaycan Xalq Cümhuriyyətinin əldə etdiyi nailiyyətlərdən, respublikanın qurucularının böyük xidmətlərindən söz açıb.
Ölkəmizin 1991-ci ildə müstəqilliyini bərpa etdiyini deyən E.Rəhimov ilk illərdə Azərbaycanın böyük çətinliklərlə üzləşdiyini, torpaqlarımızın 20 faizinin Ermənistan tərəfindən işğal olunduğunu bildirib. Qeyd edib ki, xalqın tələbi ilə ulu öndər Heydər Əliyev Azərbaycanda hakimiyyətə qayıtdıqdan sonra ölkədə sabitlik yaradılıb, iqtisadiyyat dirçəlməyə başlayıb və bütün sahələrdə inkişaf baş verib. Həmçinin Azərbaycanın xarici siyasət strategiyası müəyyənləşdirilib, dünya ölkələri ilə sıx əlaqələr qurulub. E.Rəhimov, hazırda həmin siyasətin Prezident İlham Əliyev tərəfindən uğurla davam etdirildiyini vurğulayıb.
Misirin Azərbaycandakı sabiq səfiri Yusuf Şərqavi çıxışında ölkələrimiz arasında siyasi və iqtisadi əlaqələrin yüksək səviyyədə olduğunu vurğulayıb, yeni kitabın Misir və Azərbaycanın diplomatik münasibətlərində xüsusi rol oynayacağını bildirib.
Digər çıxış edənlər - Misir Mədəniyyət Mərkəzinin sabiq müdiri Adil Dərviş və “Əxbar” qəzetinin redaktoru, tədqiqatçı-jurnalist Məhəmməd Səlamə ölkələrimiz arasındakı əlaqələrdən danışıb, Azərbaycan diplomatiyasının 100 illiyinə həsr olunan və geniş oxucu kütləsi üçün nəzərdə tutulan kitabın əhəmiyyətini diqqətə çatdırıblar.
Daha sonra iştirakçıların sualları cavablandırılıb.
Sonda Misir Xarici İşlər Nazirliyinin Misir Şurasının sədri İ.Səd ölkələrimiz arasında əlaqələrin inkişafında göstərdiyi səylərə görə E.Rəhimova təşəkkürnamə təqdim edib.
Eyni zamanda, E.Rəhimov tərəfindən Misir Şurasının sədrinə və sabiq səfirə Azərbaycan tarixini və mədəniyyətini əks etdirən milli suvenirlər təqdim olunub.
Həmçinin Azərbaycanın Misirdəki səfirliyinin adından Adil Dərvişə və Məhəmməd Səlaməyə iki ölkə arasındakı əlaqələrə töhfələrinə görə təşəkkürnamələr verilib.
Bölmənin digər xəbərləri
